سلامی وہ رن میں شہ دو جہاں ہے

سلامی وہ رن میں شہ دو جہاں ہے

جھکا جس کی تعظیم کو آسماں ہے

ادھر ہے ہویدا یزیدی اطاعت

خدا کی رضا اس طرف بھی عیاں ہے

فدائی جوتھے ہو چکے وہ فدا سب

تہہ تیغ اب شاہ کا امتحاں ہے

جو کردارِ شبیر مقتل میں دیکھا

وہ دنیا کے پردے پر ملتا کہاں ہے

نہ مانگی دعا جس نے ردِّ بلا کی

مسیحا سے بالا وہ عرش آشیاں ہے

تہہ تیغ سجدے میں سر کو جھکانا

خدایا غضب کا ترا امتحاں ہے

کرے مدح شبیر کی کیفؔ کیوں کر

نہ عالم نہ فاضل نہ وہ خوش بیاں ہے