ترے در پہ جبیں_فرسا عرب والے عجم والے

ترے در پہ جبیں فرسا عرب والے عجم والے

ترے محتاج رحمت ہیں سبھی دیر و حرم والے

تری چوکھٹ پہ کاسہ لیس اجلال و حشم والے

ترستے ہیں غلامی کو تری طبل و علم والے

لیے کاسہ گدائی کا کھڑے ہیں جام جم والے

سلام اے رحمت اللعالمیں لطف اتم والے

ترے دم سے فروزاں ہے ابھی تک شمع سینائی

تری تصدیق سے داؤد کی بجتی ہے شہنائی

ترے اعجاز سے زندہ ہے اعجاز مسیحائی

تری رحمت سے کل نبیوں نے عمر جاوداں پائی

نہ کیوں فخر رسل ہوتا تو اے خیر امم والے

سلام اے رحمت اللعالمیں لطف اتم والے

عبارت جس سے خود فکر و نظر کی بزم آرائی

ہے جس کی خاک پر خود سرمۂ تنویر دانائی

بصیرت کو عطا کرتی ہے جس کی ذات بینائی

وہ امی جس کی حکمت پر فدا حکمت کی پنہائی

بظاہر ہے لقب امی مگر لوح و قلم والے

سلام اے رحمت اللعالمیں لطف اتم والے

شفیع روز محشر ہے تو فخر نوع انسانی

کہیں معراج روحانی کہیں معراج جسمانی

سلام اے پیکر رحمت سلام اے لطف ربانی

ترے اشکوں کے قطرے سے خجل رحمت کی طغیانی

سلام اے شافع محشر سلام امت کے غم والے

سلام اے رحمت اللعالمیں لطف اتم والے

کبھی گوش مقدس نے سنا یاسین کا نغمہ

زہے انداز محبوبی کبھی پایا لقب طہٰ

کبھی برد یمانی میں ملا تمغہ مزمل کا

زہے واللیل کی نکہت زہے والشمس کا جلوہ

وہ روئے پر ضیا والے وہ زلف خم بہ خم والے

سلام اے رحمت اللعالمیں لطف اتم والے

جفائیں سہہ کے دشمن کے لیے تو نے دعا کی ہے

منافق کو کفن میں اپنی چادر تک عطا کی ہے

تری رحمت تو اپنے کیا ہیں غیروں پر رہا کی ہے

کریمی کی مرے آقا جب اتنی انتہا کی ہے

مبارکؔ بھی کرم کا منتظر ہے اے کرم والے

سلام اے رحمت اللعالمیں لطف اتم والے