سلام اے سید جن و بشر انوار سبحانی

سلام اے سید جن و بشر انوار سبحانی

سلام اے محرم راز حقیقت ہائے سبحانی

سلام اے آفتاب دو جہاں شاہنشہِ بطحا

سلام اے تاجدارِ انبیا ختم رسل شاہا

سلام اے آمنہ کے لعل شاہِ یوسفِ ثانی

سلام اے مظہر نورالہدیٰ اے ظل سبحانی

سلام اس پر کہ جو ہم بے سہاروں کا سہارا ہے

سلام اس پر کہ جس کا نام عالم آشکارا ہے

سلام اس پر کہ جس کی وجہ سے توقیر آدم ہے

سلام اس پر کہ جس کے واسطے تخلیق عالم ہے

سلام اس پر کہ ہے جس سے فروزاں شمعِ ایمانی

سلام اس پر کہ جس کے نور سے ہے نورِ قرآنی

سلام اس پر کہ جس کے قبل یہ دنیا تھی ویرانہ

سلام اس پر جس کے پیشتر زنداں تھا میخانہ

سلام اس پر کہ فرمان خدا کو جس نے فرمایا

سلام اس پر کہ جس نے قلب کو ایماں سے گرمایا

سلام اس پر کہ جس کے دشمنوں کو اعتراف اس کا

سلام اس پر کہ ہے جبریل بھی محو طواف اس کا

سلام اس پر کہ لاثانی ہے جو شانِ شہنشاہی

سلام اس پر کہ جس نے دشمنوں کی مغفرت چاہی

سلام اس پر کہ جس نے رات رو رو کر دعائیں کیں

سلام اس پر کہ جس نے بیوفاؤں سے وفائیں کیں

سلام اس پر کہ ایسا گل قیامت تک نہیں کھلتا

سلام اس پر کہ جس کے قد کا سایہ تک نہیں ملتا

سلام اس پر عرق میں جس کے پنہاں عطر و عنبر ہے

سلام اس پر مشامِ جاں ہے جو زلفِ پیمبر ہے

سلام اس پر کیا تھا چاند کو جس چاند نے ٹکڑے

سلام اس پر کہ جس کے نام پر روح بلال اکھڑے

سلام اس پر کہ جس کے دم سے دنیا کا چمن گلشن

سلام اس پر کہ جس کے نور سے مرقد مری روشن

سلام اے سید عالی نسب والا گہر شاہا

سلام اے جلوۂ رحمان کے حد نظر شاہا

سلامِ صاحبؔ ہجراں نصیب بے نوا لینا

بوقف واپسیں مولا مدینے میں بلا لینا