سلام_عشق تجھے اے بہار_غم بینی

سلام عشق تجھے اے بہار غم بینی

ترے نثار مرے اشک خوں کی رنگینی

وہ تیرا حلق بریدہ جمال خودداری

وہ تیرا سجدۂ آخر کمال خود بینی

وہ تیرے ٹوٹے ہوئے بازوؤں کا رعب و جلال

لرز رہی ہے کھڑی دور فوج بے دینی

حسین کیسے زمانے سے ساز کر سکتے

کبھی ہوئی ہے محبت سے مصلحت بینی

تمام دولت و شاہی تمام فوج و سپاہ

دبا نہ ساری خدائی سے ضعف مسکینی

ہیں مضطرب ترے ماتم میں مشرق و مغرب

تڑپ رہے ہیں ترے غم میں ترکی و چینی

ہے تیرے خوں سے خد و خال حسن میں گرمی

ہے تیرے خوں سے محبت کے غم میں رنگینی

غلام اس کا ہوں میکشؔ کہ جمع ہیں جس میں

خدا و بندہ و خود بینی و خدا بینی