سلام اس پر جو والی_و_وارث ہے محمد کا

سلام اس پر جو والی و وارث ہے محمد کا

کیا ہے نام روشن جس نے اپنے جد امجد کا

سلام اس پر جو روح پنجتن جان پیغمبر ہے

وہی مسند نشیں ہے سید عالم کی مسند کا

سلام اس پر محبت کا سبق جس نے دیا ہم کو

کیا تازہ مذاق عشق منصور اور سرمد کا

ملا ہے سر تو سجدہ اس کے سنگ در کا لازم ہے

جو آنکھیں ہوں تو نظارہ ہو اس کے سبز‌ گنبد کا

گدائی میں ملی شاہی مجھے اس کی عنایت سے

بھلا کیوں کر ادا ہو شکر اس کے لطف بے حد کا

سلام اس پر جو ہم رندوں کا ہے پیر مغاں اخترؔ

پلایا جام رنگیں جس نے سب کو حب احمدؐ کا