در نبی پہ اے جانے والو، مرا بھی ان سے پیام کہنا

در نبی پہ اے جانے والو، مرا بھی ان سے پیام کہنا

جو پہنچو تم جالیوں کے آگے، درود کہنا سلام کہنا

نجانے آئے گا کب بلاوا، نجانے کب ہوگی پھر حضوری

حضور فرقت میں آپ کی اک، تڑپ رہا ہے غلام کہنا

اٹھی ہیں طیبہ کی اور آنکھیں کہ اشک ان میں مچل رہے ہیں

بیان کرنا مری یہ حالت، یہ قصۂ غم تمام کہنا

سنا ہے خود آپ ہیں بلاتے، سنا ہے قسمت بھی ہیں جگاتے

حضور میرے کرم بھی جاگیں کہ خود ہی ہو انتظام کہنا

اگر نہ ہو ساتھ ان کی رحمت، اگر کرم نہ ہو ان کا شامل

نہ اٹھ سکوں گا اگر گرا تو، نہ چل سکوں گا دو گام کہنا

بروزِ محشر ملے شفاعت، وہاں وہاں پہ ڈھونڈیں گے سب سہارے

مرے لبوں پر رہے گا جاری، حضور کا یہ نام کہنا

سنا جو خیرات کا تو ارسلؔ میں لے کے کشکول آ گیا ہوں

ہے تیرے اس میکدے کا چرچا، پلا دو ہاتھوں سے جام کہنا