مبارک ہو کہ مفہوم کرم سمجھا گیا سہرا

مبارک ہو کہ مفہوم کرم سمجھا گیا سہرا

مثالِ ابرِ رحمت زندگی پر چھا گیا سہرا

ہر اک مہمان کا دل جھوم اٹھا چاہت کی خوشبو سے

فضائے انجمن کو اس طرح مہکا گیا سہرا

مبارک تجھ کو اے دولہا دلہن والوں کی خوشنودی

تری خاطر خوشی کا نور لے کر آگیا سہرا

خدا رکھے بہت ہی خوش ہیں ماں باپ اور بہن بھائی

مبارک ہو عزیزوں کے دلوں کو بھا گیا سہرا

رہِ الفت میں دو دلِ جیسے پیمان وفا باندھیں

سر نو شاہ پر اس پیار سے باندھا گیا سہرا

بہن بہنوئی بھائی بھابی سب محوِ نظارا ہیں

مقامِ شکر ہے سب کی نظر میں آگیا سہرا

پھپھی بھی خوش پھپھا بھی خوش ہیں، خوش ہیں خالہ خالو بھی

ممانی اور ماموں کے بھی دل کو بھا گیا سہرا

دمکتا ہے خوشی کے نور سے نوشاہ کا چہرہ

وہ دیکھو چہرۂ نو شاہ سے شرما گیا سہرا

بلائیں لیں جو نوشہ کی چچی نے اور اماں نے

تو چاہت کی مہک سے بزم کو مہکا گیا سہرا

رہیں گے عمر بھر آپس میں دولہا اور دلہن مخلص

کہ پڑھ کر قل ھو اللہ احد گوندھا گیا سہرا

دعائیں کیوں نہ دیں دولہا کو رشتہ دار دلہن کے

کہ تقدیر عروس خوشنما چمکا گیا سہرا

عزیز و اقربا باراتی اور اہل محلہ کو

خدا کے فضل و رحمت سے بہت ہی بھا گیا سہرا

مبارک باد سب احباب دیں نوشاد کو انورؔ

یہ اس کا پیار ہے جو پیار سے لکھا گیا سہرا