ازل سے ہے سر_قرآن بسم_اللہ کا سہرا

ازل سے ہے سر قرآن بسم اللہ کا سہرا

کلام اللہ پر ہے یہ کلام اللہ کا سہرا

درخت قل ہو اللہ احد کے پھول چن چن کر

بنایا ایک لا الہ الااللہ کا سہرا

کیا نام خدا مردوں کو زندہ ابن مریم نے

سجایا سر پہ جس دم قم باذن اللہ کا سہرا

خدائی کر دکھاتے ہیں جہاں میں تیرے متوالے

یہ ہے اعجاز حق عشق رسول‌ اللہؐ کا سہرا

چڑھا منصورؔ کے سر جس گھڑی سہرا انا الحق کا

گلے کا ہار پھر ٹھہرا فنا فی اللہ کا سہرا

پتہ ملتا ہے دیکھا آپ کو چشم حقیقت سے

سراپا اپنی ہستی ہے کلام اللہ کا سہرا

مٹا کر بندگی سے اپ کو اللہ تک پہنچا

گل وحدت سے گوندھا جس نے الا اللہ کا سہرا

ہوئی ہے چیز بھی معشوق کی معشوق عاشق کو

کہ رکھا سر پہ امت کے رسول اللہ کا سہرا

کروں نشوونما گر آغازؔ گر میں راہ الفت میں

پس مردن سر مرقد ہو بیت اللہ کا سہرا