آواز پر اشعار

سانس میں آواز نے ہے دل غزل خواں ہے ذھینؔ

شاید آنے کو ہے وہ جان بہاراں اس طرف

میرے نالہ سن کے فرماتے ہیں وہ

یہ اسی کی دکھ بھری آواز ہے

چھپ اس طرح کہ ترا عکس بھی دکھائی نہ دے

تری صدا تری آواز بھی سنائی نہ دے

سنا ہے ہم نے بہت کچھ کلیم کے منہ سے

ہم آئیں تو ہمیں آواز ہی سنا دینا

پڑ گیا پردہ سماعت پر تری آواز کا

ایک آہٹ کتنے ہنگاموں پہ حاوی ہو گئی

اسی کا ہے رنگ یاسمن میں اسی کی بو باس نسترن میں

جو کھڑکے پتا بھی اس چمن میں خیال آواز آشنا کر

بجز آواز زنجیر گراں کچھ خوش نہیں آتا

یہاں تک بھر گئے ہیں کان آواز سلاسل سے

کیوں مست شراب عیش و طرب تکلیف توجہ فرمائیں

آواز شکست دل ہی تو ہے آواز شکست جام نہیں

سنائی جائے گی جب تک مجھے سزائے سخن

سکوت وقت میں آواز بھر چکا ہوں گا

کبھی تنہائیٔ منزل سے جو گھبراتا ہوں

ان کی آواز یہ آتی ہے کہ میں آتا ہوں

روز ازل الست کا مذکور ہو چکا

صاحب دلاں کی کان پر آواز ہے ہنوز

کچھ آوازیں آتی ہیں سنسان شب میں

اب ان سے بھی خالی بیاباں ہوئے ہیں

آپ کی آواز میں ہے دعوت منزل کا راز

کاروان شوق کی بانگ درا ہو جائیے

یہ رعب ہے چھایا ہوا شام شب غم کا

دیتا نہیں آواز بجانے سے گجر بھی

بزم خلوت میں اگر چھپ کے حیا آنے لگی

بڑھ کے آواز دی شوخی نے کہ باہر باہر

وہ بھی صادقؔ گوش بر آواز ہیں

اب میری آواز کچھ ہے تو سہی

چھیڑ کر آزما لیا ہم نے

تیری آواز تار سے نکلی

کیوں اے دل مضطر ہوئے کیا وہ ترے نالے

اے ساز شکستہ تری آواز کہاں ہے

پتھر مجھے شرمندۂ گفتار نہ کر دے

اونچا مری آواز کو دیوار نہ کر دے

ڈھونڈنے نکلا تھا آوازوں کی بستی میں اسے

سوچ کر ویراں گزر گاہوں پہ بیٹھا رہ گیا

دور جا کر مری آواز سنی دنیا نے

فن اجاگر مرا آئینۂ فردا سے ہوا

ہر اک جسم میں ہے وہی بس خموش

ہر آواز میں بولتا ہے وہی

ڈوب کر دیکھ سمندر ہوں میں آوازوں کا

طالب حسن سماعت مرا سناٹا ہے

جہاں آواز نامحرم کا آوے

وہ توبہ کر وہاں سوں اٹلی جاوے