Chaand Shayari

pareshāñ kis liye haiñ chāñd se ruḳhsār par gesū

haTā liije ki dhundlī chāñdnī achchhī nahīñ lagtī

pareshan kis liye hain chand se ruKHsar par gesu

haTa lije ki dhundli chandni achchhi nahin lagti

use chāñd-sūraj se tashbīh kyā duuñ

jo hai rashk-e-shams-o-qamar allāh allāh

use chand-suraj se tashbih kya dun

jo hai rashk-e-shams-o-qamar allah allah

misr kā chāñd bhī shaidā hai azal se un kā

husn kā husn bhī dīvāna nazar aatā hai

misr ka chand bhi shaida hai azal se un ka

husn ka husn bhi diwana nazar aata hai

chāñd sā mukhḌā us ne dikhā kar phir naināñ ke baan chalā kar

sa.variyā ne bīch-bajariyā luuT liyo bas nirdhan ko

chand sa mukhDa us ne dikha kar phir nainan ke ban chala kar

sawariya ne bich-bajariya luT liyo bas nirdhan ko

vo bikhrāne lage zulfoñ ko chehre par to maiñ samjhā

ghaTā meñ chāñd yā mahmil meñ lailā muñh chhupātī hai

wo bikhrane lage zulfon ko chehre par to main samjha

ghaTa mein chand ya mahmil mein laila munh chhupati hai

ḳhud tumeñ ye chāñd-sā mukhḌā karega be-hijāb

muñh pe jab māroge tum jhurmuT katāñ ua jaye.gā

KHud tumen ye chand-sa mukhDa karega be-hijab

munh pe jab maroge tum jhurmuT katan ua jayega

mirā dāġh-e-sajda miTā.e kyuuñ falak us ko chāñd banā.e kyuuñ

ki ye daaġh hāsil-e-āshiqī hai mirī jabīn-e-niyāz meñ

mera dagh-e-sajda miTae kyun falak us ko chand banae kyun

ki ye dagh hasil-e-ashiqi hai meri jabin-e-niyaz mein

muddat meñ jalva-gar hue bālā-e-bām vo

us chāñd ko maiñ dekhūñ ki dekhūñ qamar ko maiñ

muddat mein jalwa-gar hue baala-e-baam wo

us chand ko main dekhun ki dekhun qamar ko main

chāñd sā mukhḌā us ne dikhā kar phir naināñ ke baan chalā kar

sa.variyā ne bīch-bajariyā luuT liyo is nirdhan ko

chand sa mukhDa us ne dikha kar phir nainan ke ban chala kar

sawariya ne bich-bajariya luT liyo is nirdhan ko

aur bhī chāñd kī shakleñ haiñ nahīñ aap na hoñ

nuur kī sham.eñ nahīñ raushan mire kāshāne meñ

aur bhi chand ki shaklen hain nahin aap na hon

nur ki shamen nahin raushan mere kashane mein

mujh se lage haiñ ishq kī azmat ko chaar chāñd

ḳhud husn ko gavāh kiye jā rahā huuñ maiñ

mujh se lage hain ishq ki azmat ko chaar chand

KHud husn ko gawah kiye ja raha hun main

are o charḳh dene ke liye daaġh

bahut haiñ chāñd ke TukḌe zamīñ par

are o charKH dene ke liye dagh

bahut hain chand ke TukDe zamin par

tere husn kī dekh tajallī ai rashk-e-hūr

sūraj kahūñ ki chāñd ki nūr-e-ḳhudā kahūñ

tere husn ki dekh tajalli ai rashk-e-hur

suraj kahun ki chand ki nur-e-KHuda kahun

ishq meñ chāñd-sitāroñ kī haqīqat kyā ho

jalva-e-yār pe qurbān sahar hotī hai

ishq meñ chāñd-sitāroñ kī haqīqat kyā ho

jalwa-e-yār pe qurbān sahar hotī hai

tū bichhaḌ gayā hai jab se mirī niiñd uḌ ga.ī hai

tirī raah tak rahā huuñ mire chāñd ab to aa jā

tū bichhaḌ gayā hai jab se mirī niñd uḌ gaī hai

tirī rah tak rahā huñ mere chāñd ab to aa jā

vo chāñd sā muñh surḳh dupaTTa meñ hai raḳhshāñ

yā mehr kahūñ jalva-numā zer-e-shafaq hai

wo chand sa munh surKH dupaTTa mein hai raKHshan

ya mehr kahun jalwa-numa zer-e-shafaq hai

ākāsh kī jagmag rātoñ meñ jab chāñd sitāre milte haiñ

dil de de sanam ko tū bhī ye qudrat ke ishāre milte haiñ

aakash ki jagmag raaton mein jab chand sitare milte hain

dil de de sanam ko tu bhi ye qudrat ke ishaare milte hain

vasl meñ gesū-e-shab-gūñ ne chhupā.ī aariz

lailatul-qadr meñ kyuuñ chāñd nikalne na diyā

wasl mein gesu-e-shab-gun ne chhupai aariz

lailatul-qadr mein kyun chand nikalne na diya

jalva-e-ruḳhsār-e-sāqī sāġhar-o-mīnā meñ hai

chāñd uupar hai magar Duubā huā dariyā meñ hai

jalwa-e-ruKHsar-e-saqi saghar-o-mina mein hai

chand upar hai magar Duba hua dariya mein hai

chāñd sī peshānī sindūr kā Tiikā nahīñ

bām-e-ka.aba par charāġh is ne jalā kar rakh diyā

chand si peshani sindur ka Tika nahin

baam-e-kaba par charagh is ne jala kar rakh diya

tere mukhḌe ko yuuñ take hai dil

chāñd ke joñ rahe chakor lagā

tere mukhDe ko yun take hai dil

chand ke jon rahe chakor laga