Ehsan Shayari

ham rañj bhī paane par mamnūn hī hote haiñ

ham se to nahīñ mumkin ehsān-frāmoshī

hum ranj bhi pane par mamnun hi hote hain

hum se to nahin mumkin ehsan-framoshi

merī zabāñ pe shikva-e-ahl-e-sitam nahīñ

mujh ko jagā diyā yahī ehsān kam nahīñ

meri zaban pe shikwa-e-ahl-e-sitam nahin

mujh ko jaga diya yahi ehsan kam nahin

yā tū ne nazar ḳhīra kar dī ai barq-e-tajallī yā ham hī

dīdār meñ apnī āñkhoñ kā ehsān uThānā bhuul ga.e

ya tu ne nazar KHira kar di ai barq-e-tajalli ya hum hi

didar mein apnī aankhon ka ehsan uThana bhul gae

pilā.e ḳhum pe ḳhum ehsān dekho

mujhe saaqī ne ḳhumḳhānā banāyā

pilae KHum pe KHum ehsan dekho

mujhe saqi ne KHumKHana banaya

tauba kā TūTnā thā ki ruḳhsat huī bahār

ehsān-mand-e-jurm-o-ḳhatā bhī na ho sake

tauba ka TuTna tha ki ruKHsat hui bahaar

ehsan-mand-e-jurm-o-KHata bhi na ho sake

dard minnat-kash-e-darmān-e-masīhā na huā

terā ehsān hai yārab ki maiñ achchhā na huā

dard minnat-kash-e-darman-e-masiha na hua

tera ehsan hai yarab ki main achchha na hua

hotā nahīñ hai sar se mere ye kabhī judā

ehsān māntā huuñ maiñ ehsān-e-pīr kā

hota nahin hai sar se mere ye kabhi juda

ehsan manta hun main ehsan-e-pir ka

uzr kuchh mujhko nahīñ qātil tū bismillah kar

sar ye hāzir hai magar ehsān mere sar na ho

uzr kuchh mujhko nahin qatil tu bismillah kar

sar ye hazir hai magar ehsan mere sar na ho

dil diyā jaan dī ḳhudā tū ne

terā ehsān ek ho to kahūñ

dil diya jaan di KHuda tu ne

tera ehsan ek ho to kahun