شیخ شیوخ العالم حضرت بابا فرید مسعود گنج شکر کے مجموعۂ ملفوظات اسرارالاؤلیا کا مطالعہ

اسرارالاؤلیا (فارسی نسخہ) مطبوعہ 1334 ۔ 1915 (بار ششم) مطبوعہ نول کشور کان پور حجم 94 صفحات سائز 17X37/8 مسطر25 سطری قلم خفی، اس کتاب میں حضرت بابا صاحب کے ملفوظات ہیں جو بائیس فصلوں پر مشتمل ہیں، ہر فصل کا عنوان جدا گانہ ہے، اس کے جامع مولانا بدرالدین اسحاق ہیں جو حضرت بابا صاحب کے خلیفہ و داماد اور حضرت بابا صاحب کی خدمت میں ہمہ وقت کے حاضر باش تھے۔

اسرارالاؤلیا کی قدامت:- عہدِ مغلیہ کے شہرۂ آفاق عالم، درویش اور مسلم الثبوت اہلِ قلم شیخ عبدالحق محدث دہلوی (المتوفیٰ 1051 ہجری مطابق 1641 عیسوی) مولانا بدالدین اسحاق کے احوال میں لکھتے ہیں:-

دے را رسالۂ ایست مسمیٰ اسرارالاؤلیا کہ در وے ملفوظاتِ گنج شکر راجع کردہ در علم تصریف کتابے نظم کردہ است

ترجمہ :- ان کا ایک رسالہ ہے جس کا نام اسرارالاؤلیا ہے جس میں انہوں نے حضرت بابا صاحب کے ملفوظات جمع کئے ہیں، علم صرف میں ایک کتاب نظم کی ہے۔

(اخبار الاخیار، مجتبائی پریس، صفحہ 67)

مفتی غلام سرور لاہوری مرحوم نے مولانا بدالدین اسحاق کے ذکر میں لکھا ہے:-

کتاب اسرارالاؤلیا تصنیف وے است

(خزینۃ الاصفیا جلد 1 صفحہ 319)

کتاب اسرارالاؤلیا ان کی (مولانا بدالدین اسحاق) کی تصنیف ہے۔

درین خاندان دو کتاب بنام سیرالاؤلیا معروف و مشہور است یکے تالیف مولانا بدرالدین اسحاق کہ از ملفوظاتِ خواجہ فریدالحق والدین جمع آوردہ است دوم سیرالاؤلیاء تالیف سید محمد بن مبارک کرمانی رحمۃ اللہ علیہ۔

(خزینۃ الاصفیاء جلد 1 صفحہ 366 نول کشور)

اس خاندان میں سیرالاؤلیا نام سے دو کتابیں معروف و مشہور ہیں، ایک مولانا بدرالدین اسحاق کی تالیف ہے جس میں حضرت بابا صاحب کے ملفوظات جمع کئے ہیں، دوسری سیرالاؤلیا سید محمد بن مبارک کی تالیف ہے۔

مفتی غلام سرور لاہوری مرحوم کے بیان سے معلومات میں یہ اضافہ ہوتا ہے کہ سیرالاؤلیا نامی کوئی کتاب مولانا بدرالدین اسحاق کی تالیف بھی ہے جو حضرت بابا صاحب کے ملفوظات پر مشتمل ہے جو اسرالاؤلیا کے علاوہ ہے جس کا ذکر انہوں نے مولانا بدرالدین اسحاق کے احوال میں کیا ہے مگر نہ تو مفتی غلام سرور لاہوری مرحوم ہی نے متذکرہ سیرالاؤلیاء کا ذکر مولانا بدرالدین اسحاق کے احوال میں کیا ہے اور نہ کسی اور نے ممکن ہے کہ مغالطہ ہوا ہو، یہ کتاب سیرالاؤلیا تالیف مولانا بدرالدین اسحاق ہمارے مطالعہ میں بھی نہیں آئی، اس لئے ہم اس کے متعلق اظہارِ خیال سے معذور ہیں۔

کتاب شمائل الانقیاد دلائل الاتقیا تالیف مولانا رکن الدین عماد کاشانی کی فہرست مآخذات میں اسرارالمتحیرین نامی ایک کتاب ہے جو حضرت بابا صاحب ہی کے ملفوظات پر مشتمل ہے جو نایاب ہے، مؤلف کا نام بھی نہیں لکھا ہے ممکن ہے متذکرہ سیرالاؤلیا سے مراد یہی کتاب ہو، تاہم فی الحال وثوق سے کچھ نہیں کہا جاسکتا۔

حضرت خواجہ غلام فرید چشتی (المتوفیٰ 1319 ہجری مطابق 1901 عیسوی) جو عہدِ ماضی قریب کے ممتاز ترین مشائخ میں تھے جن کی عالمانہ اور درویشانہ شخصیت محتاجِ تعارف نہیں ہے، ان کے ملفوظات کا مطالعہ بتاتا ہے کہ علوم و فنون سے انہیں کمالِ آگاہی تھی وہ فرماتے ہیں:-

بدرالدین اسحاق قدس اللہ سرہ جو اسرارالاؤلیاء کے جامع مسجد ہیں، ان کا ضبط تاریخ و الفاظ اس قدر پختہ ہے کہ جو کچھ انہوں نے شیخ شیوخ کی زبان در فشاں سے سنا اسی طرح لکھ دیا، اختلاف کی کوئی گنجائش ہی نہیں ہے۔

(مقابیس المجالس، صفحہ 365)

متاخرین میں یہ ان جلیل القدر بزرگ کا بیان ہے جو علم و فضل اور بصیرت باطنی سے مالا مال تھے، اس بیان سے یہ مترشح ہے کہ موصوف کے زیر مطالعہ اسرالاؤلیاء کا کوئی مستند و معتبر نسخہ تھا جس کی صحت پر انہیں کامل بھروسہ تھا، شیخ عبدالحق محدث دہلوی کا بیان نقل کیا جا چکا ہے وہ نہایت درجہ نقہ اور باکمال بزرگ تھے، یقیناً ان کے پیش نظر بھی اسرارلاؤلیاء کا کوئی قدیم و مستند نسخہ تھا، ممکن ہے کہ وہ قدامت کے جملہ اوصاف سے متصف ہو، تاہم شیخ عبدالحق محدث دہلوی جیسے باکمال بزرگ سے متعلق اس بدگمانی کی ذرا بھی گنجائش نہیں ہے کہ وہ کسی نومولود نسخے کومولانا بدرالدین اسحاق سے منسوب فرماتے جو اصول تصوف اور تعلیمات اسلامی کے خلاف مضامین پر مشتمل ہونا وہ اصول تصوف سے بھی بہرہ کامل رکھتے تھے اور تعلیمات اسلامی سے بھی اگر کم علمی اور بداحتیاطی کا شائبہ بھی پاتے تو بلا شبہ ان کی حق گوئی ہر گز اس کے اظہار میں تامل نہ کرتی۔

سات سو برس سے زیادہ زمانہ گزر چکا ہے ہزارہا علمائے مشائخ اور صوفیائے کرام گزرے ہیں، ان بزرگوں کے جو ملفوظات دستیاب ہوتے ہیں، ان سے واضح ہے کہ ان حضرات نے بھی اسرالاؤلیا سے استفادہ کیا ہے اور روگردانی نہیں فرمائی ہے یہ بھی ہے کہ دستیاب شدہ کتب ملفوظات میں قدامت کے اعتبار سے جو فوقیت نسخۂ اسرارالاؤلیا کو حاصل ہے وہ اور کسی کو حاصل نہیں، کتب ملفوظات کے جو قدیم ترین نسخے ہندوستان کے مشہور و معتبر کتب خانوں (لائبریریوں) میں محفوظ ہیں ان میں سب سے قدیم نسخہ اسرارالاؤلیا ہی کا ہے جو 1008 ہجری (دس سو آٹھ ہجری) کا مکتوبہ ہے اور جو مولانا آزاد لائبریری مسلم یونیورسٹی علی گڑھ (انڈیا) کے ذخیرۂ مخطوطات کی زینت ہے۔

خلاصۂ کلام یہ ہے کہ ہر اعتبار سے اسرارلاؤلیا کا قدیم و مستند ہونا اور مولانا بدرالدین اسحاق کی تالیف ہونا ثابت ہے، حتیٰ کہ داخلی شواہد سے بھی اس کی تائید ہوتی ہے، البتہ عصری حالات کی اثر اندازی سے اور الحاق و تحریف سے مبرا ہونے سے انکار نہیں کیا جاسکتا اور اس سے کسی قلمی کاوش کو مفر نہیں ہے، لہٰذا ضرورت ہے کہ صحت و مقابلہ سے آراستہ کر کے اسرارالاؤلیا کو منظر عام پر لایا جائے تاکہ متدین معاشرہ کو اور دینی و اخلاقی اور صوفیانہ قدروں کو از سر نو رواج عام نصیب ہو اور طالبانِ حق کی تشنتگی رفع ہو۔

جوامع الکلم بیان:- خواجہ سید محمد حسینی گیسودراز بندہ نواز مخدوم نصیرالدین چراغ دہلی کے خلفا میں نامور شخصیت کے مالک گزرے ہیں، ان کی سوانحِ حیات سے واضح ہے کہ وہ مخدوم نصیرالدین چراغ دہلی کی وفات 757ھ کے بعد عتباتِ عالیات کی زیارت کرتے ہوئے دہلی سے دکن تشریف لے گئے تھے، گلبرگہ میں قیام فرما ہوئے اور وہیں 825ھ میں انتقال ہوا، مزار انوار گلبرگہ ہی میں ہے اور مرجع خلائق ہے۔

اس سفر کے دوران خواجہ گیسودراز بندہ نواز حضرت بابا صاحب کے مزار پُرانوار کی زیارت کو بھی گئے تھے، جوامع الکلم کی ایک ژدلیدہ عبارت یہ بتائی ہے کہ قیام اجودھن (پاک پٹن) میں انہوں نے ایک مجموعہ ملفوظات دیکھا تھا جسے بعض مولانا بدرالدین اسحاق کا مرتبہ بتاتے تھے اور بعض کو اس سے انکار تھا، جوامع الکلم کی مشمولہ عبارت یہ ہے:-

ملفوظے ازاں شیخ فریدالدین در اجودھن دیدم کہ آں را نسبت بہ مولانا بدرالدین اسحاق می کنند سربسر ہمہ افترا است می گویند کہ جمع کردہ مولانا بدرالدین اسحاق نیست

(جوامع الکلم صفحہ 134)

ترجمہ :- میں نے اجودھن میں شیخ فریدالدین کا ایک ملفوظ دیکھا ہے جسے مولانا بدرالدین اسحاق سے منسوب کرتے ہیں وہ تمام تر بہتان ہے، کہتے ہیں کہ مولانا بدرالدین اسحاق کا جمع کیا ہوا نہیں ہے۔

اس بیان کا اسلوب حضرت خواجہ گیسو دراز کے دیگر بیانات سے مختلف مشتبہ مذبذب اور مبہم ہے، یہ نہیں کھٹکتا کہ سربسر ہمہ افترا کس سے متعلق ہے، ملفوظے سے متعلق ہے یا نسبت سے اگر دونوں ہی سے ہے تو پھر می گویند جمع کردۂ مولانا بدرالدین اسحاق نیست کیا ہے، مائنا ہوگا یہ حشو ہے جس سے ابتدائی جملوں کا مفہوم مشتبہ اور مبہم ہوگیا ہے اور یہ اسقام بتاتے ہیں کہ یہ جملے حضرت خواجہ گیسو دراز جیسے باکمال انشاپرداز کے نہیں ہوسکتے بلکہ کسی ایسے شخص کے نوشتہ ہیں جو انشاء میں کامل دسترس نہیں رکھتا تھا، یہی کیفیت ان عبارتوں کی ہے جو سیرالاؤلیا اور خیرالمجالس میں الحاق کی گئی ہیں اور ایسے ہی اسقام سے الحاق عبارتیں گرفت میں آتی ہیں البتہ ذوقِ سلیم اور ادب و انشا میں دسترس درکار ہوتی ہے۔

بہر حال! اس مبہم و مشتبہ عبارت سے جو نکات برآمد ہوتے ہیں وہ یہ ہیں۔

1. ایک صدی کے اندرہی اندر مولانا بدرالدین اسحاق کے تالیف کردہ مجموعۂ ملفوظات کا ذکر مل جاتا ہے اور یہ پتہ چلتا ہے، اس عہد کے خوانداہ حضرات اس سے باخبر تھے یہ علٰحدہ بات ہے۔

بقولِ غالب:-

گرچہ ہے کس کس برائی سے دلے با ایں ہمہ

ذکر میرا مجھ سے بہتر ہے کہ اس محفل میں ہے

پھر خواہ اسرارالاؤلیا کا صحیح نسخہ دستیاب ہوسکا تھا یا نہیں مگر اس کے وجود کی نشان دہی ہوتی ہے جس سے معقولیت کے ساتھ انکار نہیں کیا جاسکتا۔

2. اس بیان سے یہ بھی علم میں آتا ہے کہ اجودھن (پاک پٹن) میں مختلف الخیال دو گروہ تھے ایک اس کا قائل تھا کہ مولانا بدرالدین اسحاق نے حضرت بابا صاحب کا مجموعۂ ملفوظات تالیف کیا تھا جو بقولہ مسخ شدہ صورت میں دستیاب ہوسکا تھا، دوسرا گرہ منکر تھا جو کہتا تھا کہ جمع کردۂ مولانا بدرالدین اسحاق نیست یعنی متذکرہ مسخ شدہ نسخہ ملفوظات مولانا بدرالدین اسحاق کا جمع کردہ نہیں ہی مگر اس سے انکار نہیں کہ انہوں نے حضرت بابا صاحب کا مجموعہ تالیف فرمایا تھا۔

3. امیر خورد کرمانی کے بیان سے بھی یہ ثابت ہے کہ اجودھن (پاک پٹن) میں ایک گروہ ایسا تھا جو مولانا بدرالدین اسحاق سے عنادل رکھتا تھا، اسی کی سازش سے شیخ بدرالدین سلیمان اور مولانا بدرالدین اسحاق کے درمیان کشیدگی ہوئی تھی اور مولانا بدرالدین اسحاق نے جامع مسجد اجودھن میں سکونت اخیتار کر لی تھی، شیخ بدرالدین سلیمان حضرت بابا صاحب کے سنجھلے صاحبزادے تھے جو بھائیوں کے مشورے سے اور بعض عقیدت مندوں کے مشورے سے حضرت بابا صاحب کے سجادہ نشیں بنے تھے، مولانا بدرالدین اسحاق ان کی خدمت بھی اسی طرح کرتے تھے جس طرح حضرت بابا صاحب کی کیا کرتے تھے مگر حاسدوں کا وہ گروہ جو منصب خادمی یا بالفاظ دیگر قرب شیخ کا طالب تھا وہی مولانا بدرالدین اسحاق کا مخالف تھا اور اسی کی سازش سے ان بزرگوں کے درمیان اختلاف کی خلیج حائل ہوئی تھی، امیر خورد کرمانی لکھتے ہیں:-

حاسدان میاں شیخ بدرالدین سلیمان درمیان خدمت مولانا بدرالدین اسحاق القائے عداوت کردند و خواستند کہ منصب خادمی خود فرد گیرند، خاطر مبارک خدمت مولانا بدرالدین اسحاق بدین سبب منفض شد۔۔۔ خدمت مولانا۔۔۔ در مسجد جمعہ آمد و بنشست

(سیرالاؤلیا، صفحہ 171)

ترجمہ :- حاسدوں نے شیخ بدرالدین سلیمان اور مولانا بدرالدین اسحاق کے درمیان کشیدگی کرا دی تھی اور وہ یہ چاہتے تھے کہ خادمی (قرب شیخ) کا منصب وہ حاصل کرلیں مولانا بدرالدین اسحاق کی مبارک طبیعت ان حالات سے مکدر ہوئی۔۔۔ لہذا حضرت مولانا بدرالدین اسحاق نے (کنارہ کشی اختیار کی) اور۔۔۔ جامع مسجدمیں اقامت اختیار کر لی۔

اس کشیدگی کی تلخی مولانا بدرالدین اسحاق کی وفات کے بعد بھی برقرار رہتی محسوس ہوتی ہے کہ نامساعد حالات سے مجبور ہوکر مولانا بدرالدین اسحاق کی بیوہ جو حضرت بابا صاحب کی چھوٹی صاحبزادی تھیں گھر بار کو خیرباد کہہ کر دونوں یتیم بچوں سمیت دلی چلی آئی تھیں اور تاحیات وہ دلّی ہی میں رہیں اور حضرت محبوبِ الٰہی کی کفالت میں رہیں اور ان کے بعد ان کے دونوں بچوں نے حضرت محبوبِ الٰہی کی سرپرستی میں پرورش پائی اور پروان چڑھے بلاشبہ حضرت محبوبِ الٰہی حضرت بابا صاحب کےاصلی جانشین تھے مگر فردِ خاندان یا محرم نہیں تھے، اس سے شدید کشیدگی اور کیا ہوگی کہ اللہ والوں میں صلہ رحمی کا فقدان نظر آنے لگے۔

چو کفر از کعبہ بر خیزد کجا ماند مسلمانی

4. قیامِ اجودھن (پاک پٹن) میں مجموعۂ ملفوظات کا دیکھنا بتایا گیا ہے (ملفوظے ازاں شیخ فرید الدین) اس کے متعلق یہ بتانا تھا کہ نام اس کا کیا تھا وہ نسخہ اسرارالاؤلیا تھا یا کوئی مجموعہ اور تھا کتنا حجم تھا، کب مکتوبہ تھا اور اس میں جو ملفوظات تھے جنہیں حضرت بابا صاحب سے منسوب بتایا ہے وہ کیا تھے کیسے تھے اور کیوں سربسر ہمہ افزا کی حد میں تھے خواہ وہ بے سرو پاک حکایات کا مجموعہ ہی سہی تاہم یہ بتانا ضروری تھا کہ وہ تھے جنہیں سربسر مہ افترا کہا گیا ہے کیونکہ۔

دعویٰ بلا دلیل قبولِ خرد نہیں

یہ بھی حیرت انگیز ہے کہ اجودھن (پاک پٹن) ہی میں ایسا مجموعۂ ملفوظات حضرت بابا صاحب سے منسوب دکھانے کی جسارت کی جائے جو سربسر ہمہ افترا کی حد میں داخل ہو جہاں حضرت بابا صاحب کی تعلیمات سے دل و دماغ متاثر تھے وہ کون ہوسکتا ہے جو ایسا، از کارِ رفتہ مجموعۂ ملفوظات دکھا سکتا تھا۔

الغرض یہ بیان نہایت درجہ مبہم اور بغایت از کار رفتہ ہے، اس میں حضرت بابا صاحب کو ایک عامی کی مثل یاد کیا گیا ہے (ملفوظے ازاں شیخ فریدالدین) جو نظرِ عقیدت میں دقیع نہیں ہے، حضرت خواجہ گیسو دراز کے شیخ محترم مخدوم نصیر الدین چراغ دہلی نے بھی کبھی اس طرح یاد نہیں فرمایا ہے، ان کی مبارک زبان پر جب حضرت بابا صاحب کا نام نامی آیا ہے کمال ادب و احترام سے آیا ہے جو مشرقی تہذیب کا خاصہ ہے، آئندہ نقاد بتائے گا کہ یہ چیستان سے کیا اور اس بیان کا ادب و انشاء میں کیا مقام ہے صدیاں گزر گئیں، اہلِ علم میں سے کوئی بھی اس عبارت سے متاثر نہیں نہ اس کے سہارے کسی نے اسرارالاؤلیا کو ناقابلِ اعتنا قرار دیا ہے بلکہ معترف ہیں کہ ضبط الفاظ اس قدر پختہ ہے کہ بعینہ حضرت بابا صاحب کا بیان معلوم ہوتا ہے، البتہ چودہویں صدی کے ربع آخر میں ایسے اشخاص جو ادب و انشاء کی نزاکتوں سے نا آشنا ہیں وہ اس عبارت کے سہارے اسرارالاؤلیا کو جعلی بنانے لگے ہیں۔

5. جس نسخۂ ملفوظات کا ذکر متذکرہ عبارت میں ہے اور جو سر برسہ ہمہ افترا کی مد میں شمار ہے وہ کیا تھا، اس کا آج بھی کسی کو علم نہیں ہے مگر اسرارالاؤلیاء کے دستیاب ہونے والے نسخے پر آج بھی سربسر ہمہ افترا کا اطلاق نہیں ہوتا، کیونکہ اسرارالاؤلیا کا متداول نسخہ اصولِ شریعت و طریقت کے بالکل مطابق ہے اور صحیفۂ رشد و ہدایت ہے اور اس کی روایات پر جو اعتراضات کئے ہیں وہ سطحی ہیں۔

متذکرہ بیان جسے حضرت خواجہ گیسو دراز سے منسوب کیا گیا ہے اور جوفی الواقع ان کا نہیں ہے اور جو نہایت درجہ مبہم مشتبہ اور مذبذب ہے اور جس سے صحیح نقطہ واضح نہیں ہوتا ہر گز قابلِ قبول نہیں ہے بلکہ اس کو حضرت خواجہ گیسودراز سے منسوب کھلا افترا بھی ہے اور جب کبھی کوئی صاحب کمال جوامع الکلم پر لکھے گا تو پوست کندہ کیفیت سامنے آجائے گی۔

جوامع الکلم حضرت خواجہ گیسو دراز کا مجموعۂ ملفوظات ہے جسے ان کے صاحبزادے سید محمد اکبر حسینی نے مرتب فرمایا تھا جو تمام تر دس ماہ کا مجموعۂ ملفوظات ہے (18 رجب 802 ہجری تا 22 ربیع الثانی 803 ہجری) اس پر یہ اعتراض بھی ہے، اس کے بعض بیانات سے یہ بھی مترشخ ہوتا ہے کہ حضرت خواجہ گیسو دراز مائل بشیعیت تھے مگر اس خیال کی تردید جوامع الکلم کے دیگر بیانات سے ہوتی جاتی ہے لیکن یہ واقعہ ہے اور افسوس ناک واقعہ ہے کہ جوامع الکلم میں متعدد ایسی روایتیں ہیں کہ شرم و حیا سے آج بھی کوئی مہذب باپ اپنے بیٹے کے سامنے بیان نہیں کرسکتا، کتنی ہی ایسی روایتیں ہیں جن سے بمشکل ہی کوئی اچھا نتیجہ اخذ کیا جاسکتا ہے، کتنی ایسی ہیں جن سے متدین اور نیکوکار اشخاص کی شخصیت مجروح نظر آتی ہے کہ حتی خواجہ اقبال تک بد دیانتی سے ملوث نظر آتے ہیں جو بچپن سے پڑھاپے تک حضرت محبوب الٰہی کی خدمت میں رہے تھے اور خادمِ خاص کے منصب پر فائز تھے بلکہ حضرت محبوبِ الٰہی کی ذات گرامی بھی ملوث دکھائی دیتی ہے یہ کیا ہے، اگر الحاق و تصرف نہیں ہے اسی طرح ملفوظات کے متعلق جو کچھ ہے وہ بھی الحاق و تصرف ہی ہے اور وہ حضرت خواجہ گیسو دراز کا بیان نہیں ہے۔

تاریخی اندراج :- کتب دینیات ہوں یا کتب تصوف ان میں تاریخی اندراج کی نہ کچھ اہمیت تھی اور نہ عہد قدیم میں اس کا رواج و اہتمام تھا چنانچہ متعدد کتابیں اس وصف سے معرا ملتی ہیں، غالباً اسرارالاؤلیا پہلا مجموعۂ ملفوظات ہے جس کے آغاز میں ایک تاریخی اندراج ہے جو غلط اور محرف ہے، غلطی کا سبب کاتبوں اور ناقلوں کا سہو بھی ہوسکتا ہے اور نہ تحریف و الحاق کرنے والوں کی کاریستانی ہے۔

نقاد ہو یا محقق یا سوانح نگار تاریخی اندراجات سے کام لینے سے پہلے اس کا اولین فرض یہ ہے کہ وہ تاریخی اندراجات کو خوب اچھی طرح کسوٹی پر کس لے اگر صحیح ہیں تو فہو المراد اور اگر غلط ہیں ان کو بے تکلف مسترد قرار دے اور تحقیق سے صحیح تاریخی تعین کی کوشش کرے اور ہر گز غلط تاریخی اندراج کو محور نہ بنائے ورنہ کیا دھرا سب اکارت جائے گا، سنین کے اندراجات میں اکثر غلطیاں ہوئی ہیں، خواہ نقل و کتابت ہی اس کا سبب ہو، تاریخی فرشتہ نہایت متداول تاریخی کتاب ہے مگر غلطیوں سے مبرا نہیں طبقات ناصری اور تاریخی فیروز شاہی برنی سے بھی مستثنیٰ نہیں ہیں مگر آج تک کسی دانشور نے غلط تاریخی اندراج کو صحیح و معتبر قرار دے کر محور نہیں بنایا ہے یہ انسانی لغزش ہے، اسے نظر انداز کرنا ہی ہوتا ہے۔

اسرارالاؤلیا کی پہلی فصل کے آغاز میں ایک تاریخی اندراج ہے جو غلط ہے بلکہ محرف ہے ا س کے علاوہ اس میں اور کہیں کوئی تاریخی اندراج نہیں ہے اور وہ غلط اندراج یہ ہے۔

دو شنبہ ہثردہم شعبان سن 631 ہجری احدیٰ و ثلٰثین و ستتہ مأیۃ

(اسرارالاؤلیا، صفحہ 3)

یعنی پیرکارن :- شبِ برات کے مہینے کی اٹھارہویں تاریخ 631 ہجری اس تاریخی اندراج کو تقویم کی کسوٹی پر کس کر دیکھنا چاہئے کہ صحیح ہے یا نہیں تو فہو المراد ہے اور اگر غلط ہے تو داخلی شواہد سے کام لے کر صحیح تاریخی اندراج کے استقراء کی کوشش کرنی چاہئے۔

تقویم بتاتی ہے کہ 18 شعبان 631 ہجری کو دو شنبہ نہیں جمعہ ہے، تقویم میں ایک دن کا فرق تو ہوسکتا ہے مگر بالعموم اس سے زیادہ نہیں ہوتا، تقویم کے اعتبار سے 29 کو چاند نظر آتا تھا مگر کہیں مطلع صاف تھا اور کہیں نہ تھا، لہٰذا کہیں چاند نظر آیا اور کہیں نظر نہیں آیا جہاں نظر آیا وہاں تقویم سے مطابقت برقرار رہی اور جہاں نظر نہیں آیا وہاں ایک دن کا فرق پڑ گیا، ان ہی وجوہ کی بنا پر دو مختلف مقامات پر بعض اوقات دو مختلف دنوں میں عیدالفطر منائی جاتی رہی ہے اگر اس میں دن تاریخ اور مہینے کو صحیح مان لیا جائے جو صحیح بھی ہے تو داخلی شواہد بتاتے ہیں کہ 631 ہجری غلط ہے، 657 عیسوی ہونا چاہئے جو کاتب و ناقل کے سہو کی بنا پر تحریفی کارستانی کی بدولت غلط کر دیا گیا ہے، یہ بھی ہے کہ اسرارالاؤلیاء کے مطبوعہ نسخے میں نقل و کتابت کی بکثرت غلطیاں ہیں جن کی نشاندہی بآسانی کی جاسکتی ہے، حیرت ہے کہ مطبع نول کشور، کان پور سے نسخۂ اسرارالاؤلیاء اس قدر غلط کیسے شائع ہوگیا ہے۔

داخلی شواہد :- داخلی شواہد سے کام لیا جائے تو یہ حقیقت مخفی نہیں رہی کہ اسرارالاؤلیا کی تدوین و تالیف کاتعلق کس عہد سے ہے، داخلی شواہد میں سے بعض شواہد یہ ہیں۔

1. امیر خورد کرمانی کا بیان ہے، دیگر تذکرہ نویس بھی اس سے متفق ہیں کہ مولانا بدرالدین اسحاق جب دلّی سے بخارا کے لئے روانہ ہوئے اور اجودھن (پاک پتن) پہنچے تو انہوں نے حضرت بابا صاحب کی خدمت میں حاضر کی سعادت حاصل کی تھی۔

(سیرالاؤلیاء صفحہ 170)

2. حضرت بابا صاحب آخری چوتھائی مدتِ حیات میں اجودھن (پاک پتن) میں سکونت پذیر تھے، قیام اجودھن (پاک پتن) کی مدت امیر خورد کرمانی نے اٹھارہ یا چوبیس سال بتائی ہے (اسرارالاؤلیا صفحہ 63) گویا کہ یقینی طور پر وہ بھی بتا نہیں سکے ہیں، علی بن محمود جاندار شاہ نے ستائیس سال بتائی ہے (دار نظامی صفحہ 128) اس اعتبار سے اجودھن (پاک پتن) میں قیام کا آغاز 652 ہجری اور دورانِ قیام اجودھن (پاک پتن) میں مرتب ہوتا ہے وہ 643 ہجری سے پہلے ہرگز مرتب نہیں ہوسکتا، سبب کچھ بھی ہو مگر یہ تاریخی اندراج قطعاً غلط ہے اور تحقیقی و تنقیدی نقطۂ نظر سے ہرگز اسے محور نہیں بنایا جاسکتا ہے۔

3. سن 633 ہجری میں حضرت بابا صاحب کا قیام بالاتفاق ہانسی میں تھا (سیرالاؤلیا صفحہ 94) قرین قیاس یہ ہے کہ 631 ہجری میں بھی ہانسی ہی میں ہوگا لیکن اگر ہانسی قیام نہ ہو تو نہ سہی تاہم اجودھن (پاک پتن) میں قیام ہرگز نہیں نہ تھا، واقعات شاہدی ہیں کہ حضرت بابا صاحب نے 633 سے کہیں بعد اجودھن (پاک پتن) میں سکونت اختیار کی تھی، لہٰذا جو مجموعۂ ملفوظات اجودھن (پاک پتن) میں مرتب ہوا ہے وہ 631 ہجری میں مرتب نہیں ہوا ہے بلکہ اس کے کہیں بعد ہوا ہے اور اسرارالاؤلیاء میں مندرج 631 محرف اور قطعا غلط ہے۔

3. جب خلوص اور نیک نیتی کے ساتھ اسرارالاؤلیا کا جائزہ لیا جاتا ہے اور مطالعہ کیا جاتا ہے تو زیادہ نہیں تو دو نکتے ایسے ضرور ملتے ہیں جن کی مدد سے اسرارالاؤلیا کے عہد تدوین کا تعین بآسانی کیا جاسکتا ہے۔

الف :- اسرارالاؤلیا کی آخری اور بائیسویں فصل کے اختتام پر یہ عبارت ملتی ہے۔

پس ایں بود کہ از اسرار انوار و الفاظ در را شیخ الاسلام در مدت و دراز دہ سال شنیدہ است دریں مجموعہ نوشتہ آمد

(اسرارالاؤلیا، صفحہ 94)

گویا کہ یہ مجموعۂ ملفوظات اسرارالاؤلیاء بارہ سالہ شغف و انہماک کا ثمرہ ہے جو مرتب کرنے والے کے فطری ذوق کا آئینہ دار ہے۔

ب:۔ اسرارالاولیاء کے مطالعہ سے یہ واضح ہے کہ پندرہویں فصل سے آخر تک آٹھ فصلوں کے شرکا میں حضرت محبوبِ الٰہی بھی ہیں، جس سے یہ ثابت ہے کہ اس بارہ سالہ مدت میں وہ زمانہ بھی شامل ہے کہ جب حضرت محبوبِ الٰہیؒ اجودھن (پاکپن) میں حضرت بابا صاحبؒ کی خدمت میں تھے۔

امیرِ خورد کرمانیؒ نے حضرت محبوبِ الٰہی کی خود نوشت یادداشت سے نقل کیا ہے کہ رمضان المبارک سن 669 ہجری میں حضرت بابا صاحبؒ نے حضرت محبوبِ الٰہیؒ کو خلافت نامہ عنایت فرمایا تھا، (سیر الاولیا صفحہ 116 چ) اور خواجہ امیر حسنی علا سجریؒ نے حضرت محبوبِ الٰہی کی زبانی یہ بھی نقل کیا ہے کہ حضرت بابا صاحب نے حضرت محبوبِ الٰہی ؒ کو شوال کی کسی تاریخ کو اجودھن (پاکپتن) سے دہلی بھیج دیا تھا۔ اور محرم کی پانچویں کو حضرت بابا صاحبؒ واصل بحق ہوئے تھے۔ (فوائد الفواد صفحہ 52) لہٰذا اگر سن 669 ہجری کو بارہواں سال مان لیا جائے جو قرینِ قیاس بلکہ صحیح ہے تو اسرارالاولیا کی تدوین کا آغاز سن 650 ہجری قرارد پاتا ہے جو تقویم کے اعتبار سے بھی صحیح ہے۔ بلکہ ہر اعتبار سے صحیح ہے اور واقعات کے مطابق بھی ہے۔

سن 657 ہجری کو یکشنبہ (اتوار) ہے ، اور جمادی الاآخر کا مہینہ 29 دن کا ہے، غالباً اجودھن (پاک پتن) میں مطلع صاف نہ تھا اس لئے جمادی الآخر کو 30 دن کا مہینہ مان لیا ہے جیسا کہ ہوتارہتا ہے، اس اعتبار سے 18 شعبان 657 ہجری کو دو شبنہ ہی ہے اور یہی آغاز اسرارالاؤلیا کی صحیح تاریخ ہے۔

قلمی کتابوں میں جو غلطیاں ملتی ہیں انہیں اسی طرح سلجھنا ہوتا ہے، نقاد ہو یا محقق تا وقتے کہ اس کی کارگزاری میں اخلاق و خون جگر کی چاشنی نہ ہوگی، اس کی کار کردگی کی مقبولیت حاصل نہیں کرے گی، ہر حال میں کامل احتیاط سے حق تنقید ادا کرنا چاہئے۔

خلاصۂ کلام یہ ہے کہ اسرارالاؤلیاء کی پہلی فصل کے آغاز میں جو تاریخی اندراج ہے اس کی وجود کچھ بھی ہوں مگر وہ غلط ہے، اس لئے پہلے اس کی صحت کی جانب متوجہ ہونا ہوگا جب صحیح حل مل جائے تو قدم آگے بڑھانا ہوگا ورنہ غلط اندراج کو کسی حالت میں بھی اپنا یا نہیں جاسکتا، لہٰذا تقویم کی مطابقت سے اور داخلی شواہد سے جو نتیجہ برآمد ہوتا ہے، اسے صحیح تسلیم کرنا ہوگا یہ بھی مناسب ہے کہ قدیم قلمی نسخوں کے مطالعہ سے بھی استفاہ کیا جائے۔

4. اسرارلاؤلیاء کا عہد تدوین :- تقویم کی مطابق سے اور داخلی شواہد سے یہ ثابت ہے کہ اسرارالاؤلیا کا عہدِ تدوین 657 تا 669 ہے اور یہ صحیح ہے، اس عہد تدوین کے اعتبار سے حضرت بابا صاحب کی مجالس میں حضرت محبوبِ الٰہی کی اور بعض مجالس میں مولانا برہان الدین ہانسوی کی شرکت بھی صحیح قرارپائی ہے اور شیخ نجیب الدین متوکل کی وفات کا ذکر بھی برمحل رہتا ہے، ان کے علاوہ دیگر تاریخی واقعات بھی برمحل قرار پاتے ہیں اور وہ خلفشار رفع ہو جاتا ہے جو غلط تاریخی اندراج کی بنا پر لاحق ہوتا ہے، لہٰذا عہدِ تدوین 650 ہجری تا 696 ہجری کو صحیح تسلیم کر کے اسرارالاؤلیا کا جائزہ لینا چاہئے، یقین ہے کہ پھر کوئی الجھن در پیش نہ ہوگی۔

5. امتیازی خصوصیات اسرارالاؤلیا میں بعض امتیازی خصوصیات ہیں جو اس سے پہلے کے ملفوظات کے مجموعوں میں یا تو ہیں نہیں یا اگر میں تو شاذ و نادر ہی ہیں، اس اعتبار سے اسرارالاؤلیا امتیازی و منفرد حیثیت کی مالک ہے، ان میں سے بعض کا ذکر خیر زیر قلم آتا ہے۔

6. استفسار و مکالمہ :- مولانا بدرالدین اسحاق کی پہلی حاضری کا واقعہ شاہد ہے کہ حضرت بابا صاحب کی مبارک نظر طالبوں اور حاضرِ خدمت ہونے والوں کے قلوب پر بھی رہتی تھی جو بھی سوال ان کے دل میں پیدا ہوتا ہے وہ بصیرت باطنی سے اسے معلوم کرلیتے اور تقریر ہی میں اسےحل فرما دیتے تھے، عموماً کسی کو دریافت کرنے کی ضرورت پیش نہ آتی تھی، اگر کیفیات سے مغلوب ہوکر کسی کی زبان پر کچھ آگیا ہے تو مستثنیات میں سے ہے، ایسی مثالیں اسرارالاؤلیا میں خال خال مل جاتی ہیں، اس کو مکالمہ سے تعبیر کر لیا جائے یا استفسار سے در اصل وہ ہی مغلوبیت کا تاثر، ورنہ دوران تقریر میں مداخلت و استفسار خوبی نہیں بلکہ معیوب ہے جو بے ادبی کے مصداق بھی ہوسکتا ہے۔

بہر حال! ایسی امثالیں متقدمین کی کتب ملفوظات کے بالمقابل امتیازی نوعیت کی مالک ہیں جس کی اتباع کے نقوش فوائدالفواد وغیرہ بعد کی کتب ملفوظات میں ملتے ہیں گویا کہ اسرارالاؤلیاء نقش اول ہے اور فوائدالفود نقش ثانی ہے اور وہ مثالیں یہ ہیں۔

الف :- ہمیں کہ شیخ الاسلام ایں بیت بہ زبان راند عزیزے از اہل صفہ۔۔۔ روئے بہ زمیں آورد و عرض داشت کرد۔ الخ (اسرالاؤلیاء فصل سوم، صفحہ 16)

ب :- آں گاہ عزیزے از اہلِ صفحہ حاضر بود، روئے بہ زمین آورد و عرض کرد و گفت۔ الخ (ایضاً صفحہ 17)

ج :- در آں میاں عزیزے حاضر بود عرض داشت کرد۔ الخ (اسرارالاؤلیا فصل 14 صفحہ 72)

ان مثالوں سے یہ واضح ہے کہ اسرارالاؤلیا میں استفسار و مکالمہ ہے مگر بقدر قلیل ہے، تاہم اس سے اسرارالاؤلیا کی اہمیت اور اس کی امتیازی نوعیت واضح ہے۔

7. فصول :- اسرارالاؤلیا کئی فصلوں پر منقسم ہے، ہر فصل کسی عنوان سے متعلق ہے جو ہر فصل کے آغاز میں تحریر ہے، عنوان سے متعلق معلومات اس فصل میں فراہم کی ہیں، خواہ ان معلومات کا تعلق مختلف بیانات ہی سے کیوں نہ ہو تاہم اس سے یہ سہولت ہے کہ کسی ایک بات کو پوری کتاب میں تلاش کرنے کی زحمت سے وہ چار نہیں ہونا پڑتا بلکہ کسی ایک عنوان کے تحت تلاش کرلینا کافی ہوتا ہے، تلاش میں نہ تو وقت ضائع ہوتا ہے اور نہ تکلیف گوارا کرنی پڑتی ہے، بلا شبہ خوبی لائق تحسین ہے جو اس سے پیشتر کی کتب ملفوظات میں نہیں ہے، علی بن محمود جاندار شاہ نے درّرِ نظامی میں اسرارالاؤلیا ہی کی اتباع کی ہے، اس لئے اسرارالاؤلیا نقشِ اوّل ہے اور درّرِ نظامی نقش ثانی ہے مگر فوائدالفواد اور خیرالمجالس میں یہ خوبی نایا ہے۔

بعض فصلوں کے آغاز میں بعض ممتاز ترین شرکا کے اسمائے گرامی مندرج ہیں جن سے مجالس کی نوعیت و اہمت واضح ہے، آخر میں اختتام کی نوعیت بھی واضح کی ہے، درّرِ نظامی میں ان دونوں اوصاف کا فقدان ہے۔

8. عربی فارسی ہندی مرکبات :- اسرارالاؤلیاء میں کئی مقامات ایسے ہیں جن سے ہندی، فارسی اور ہندی عربی کتات کے استعمال و رواج کا پتہ چلتا ہے اور لسانی اتحاد کی نشان وہی ہوتی ہے گویا کہ یہ تخم ریزی ہے اور زبان کے لئے جو پھلی پھولی اور پروان چڑھی جو آج گونا گوں موانعات کے باوجود ہند و پاک کی شائستہ ترین زبان ہے بعض مثالیں یہ ہیں :-

الف :- اور ابھیّا غریب گفتندے۔ (اسرارالاؤلیاء فصل پہلی، صفحہ 4)

ب :- فرید اوجوہ علمی۔ (اسرارالاؤلیا فصل دوسری، صفحہ 14)

لا :- اوراد دریش بدہنی گفتندے۔ (اسرارالاؤلیاء فصل تیرہویں، صفحہ 70)

د :- ذخیرۂ ہندی۔ (اسرارالاؤلیاء فصل تیرہویں، صفحہ 71)

اس روش کی اتباع صاحبِ سیرالاؤلیاء امیر خورد کرمانی نے کی ہے، اس اعتبار سے اسرارالاؤلیاء نقش اول اور سیرالاؤلیاء نقش ثانی ہے، خیرالمجالس میں اس اتباع کے گہرے نقوش ملتے ہیں۔

9. تبلیغی کارنامہ :- اسرارالاؤلیاء کی ایک امتیازی خوبی یہ ہے کہ اس میں ایک تبلیغی کارنامہ کا ذکر ہے جو راحت المحبین میں بھی ہے مگر فوائدالفواد اور خیر المجالس جیسی بعد کی کتبِ ملفوظات میں نہیں ہے، اس اعتبار سے اسرارالاؤلیاء اولین اور منفرد اوصاف کی مالک ہے اور واقعہ یہ ہے کہ خواجہ قطب الدین چشتی جن سے مراد خواجہ قطب الدین مودود چشتی ہیں، ان کی مجلس میں حاضرینِ مجلس میں سے کسی نے دریافت کیا کہ کوئی کیسے جانے کہ وہ کامل ہوگیا ہے اور اس نے سلوک کی منازل طے کرلی ہیں، آپ نے فرمایا کہ یہ شخص کسی مردے پر دم کرے، اگر وہ بحکمِ الٰہی زندہ ہوجائے تو یہ علامت اس کی کمالیت کی ہے۔

فیض روح القدس ارباز مدد فرماید

دیگران ہم بکنند آنچہ مسیحا می کرد

ابھی یہ گفتگو ختم ہونے نہ پائی تھی کہ ایک بڑھیا روتی دھوتی حضرت خواجہ قطب الدین چشتی کی خدمت میں حاضر ہوئی اور عرض کیا کہ میرا ایک ہی لڑکا تھا، بادشاہ نے بے گناہ اسے سولی پر چڑھا دیا ہے، آپ یہ سنتے ہیں عصاہاتھ میں لے کر اس کے ہمراہ ہو لئے موقعۂ واردات پر پہنچنے پر لڑکے کو سولی پر چڑھایا جاچکا تھا آثار زندگی باقی نہ تھی آپ نے دیکھا اور بارگاہِ الٰہی میں التجا کی خداوندا! اگر بادشاہ نے اسے بے جرم و خطا سولی پر چڑھوایا ہے تو آپ اسے زندہ فرمادیں آپ نے یہ فرمایا ہی تھا کہ دم لڑکا زندہ ہوگیا، مولانا روم نے فرمایا ہے۔

اؤلیا را ہست قدرت ازالہ

تیر جستہ باز گرداند ز راہ

اس عملِ کرامت کی برکت سے ہزاروں غیر مسلم جن کا تعلق کسی طرح ہندوستان سے تھا، مسلمان ہوگئے اور صحیح راہ عمل اختیار کرلی تھی، لکھا ہے۔

آں روز چند ہزار در ہزار ہندو مسلمان شندند (اسرالاؤلیاء، صفحہ 89)

ہندو سے مراد بدہست بھی ہوسکتے ہیں جو چشت، خراسان اور بت بامیان کے علاقہ میں آباد تھے اور وہ ہندو بھی جو عہدِ غزنوی سے غزنی ادریس کے گرد نواح میں آباد تھے اور کھلم کھلا اپنے ٹھاکروں کی پوجا پاٹ کیا کرتے تھے، گبرو ترسانہ تھی۔

استاد محترم:- اسرارالاؤلیا ہی سے ہماری معلومات میں یہ اضافہ ہوتا ہے کہ حضرت بابا صاحب کے ایک استاد محترم کا نامِ نامی مولانا بہاؤالدین بخاری تھا، آپ نے فرمایا:-

اے درویش! وقتے از زبان استاد خود شنیدم مولانا بہاؤالدین بخاری رحمۃ اللہ علیہ کہ وقتے خواجہ تمیم انصاری رحمۃ اللہ علیہ بردست حبشیان گرفتار شدہ بود

(اسرارالاؤلیاء صفحہ 30)

ایک دفعہ یہ بھی ذکر فرمایا:-

اے درویش! از شیخ بہاؤالدین بخاری کہ یکے ازد واصلان حق بود ایں قطعہ از دیاد دارم اما از شوق گفتہ بود

من اول روز چوں در توبدیدم شیفتہ گشتم

ندانستم تو بودے یا کہ بودست ایں کہ من دیدم

چنا در روئے آں جاناں شدم من شیفتہ دالہ

کہ من از خود شدم بیروں ترا در جان و تن دیدم

الغرض ان امتیازات سے اسرارالاؤلیا کی انفرایت واضح ہے، اسرارالاؤلیا کے مطالعہ سے معلومات میں وہ اضافہ ہوتا ہے جو دیگر کتب ملفوظات کے مطالعہ سے نہیں ہوتا۔

اسرارالاؤلیاء کی ضمانت :-

اسرارالاؤلیاء:- اسرارالاؤلیا کے فارسی مطبوعہ نسخے کا حجم 94 صفحات ہے، مولانا بدرالدین اسحاق نے یہ بھی وضاحت فرمائی ہے کہ انہوں نے یہ صحیفہ رشد و ہدایت بارہ سال میں مرتب فرمایا ہے، اس بیان کے صحیح ہونے میں شک و شبہ کی گنجائش نہیں، حضرت محبوبِ الٰہی کا ارشا ہے:-

مولانا بدرالدین اسحاق چناں خادمی شیخ الشیوخ العالم قدس اللہ سرہ العزیز کردے کہ از دہ تین چنان خدمت نیامد بآں بہم مستغرق و مشغول حق بودے تابحدے کہ بخدمت شیخ شیوخ العالم نشستہ مستغرق حق تعالیٰ بودے کہ از خود خبر نہ داشتے

(سیرالاؤلیاء صفحہ 177)

ترجمہ :- مولانا بدرالدین اسحاق حضرت بابا صاحب کی ایسی خدمت کرتے تھے جو دس آدمی بھی نہیں کرسکتے تھے (اس مشغولی کے باجود) نہایت مستغرق اور یاد حق میں محو رہتے تھے حتیٰ کہ جب جضرت بابا صاحب کی خدمت میں بیٹھے تو بھی ہمہ تن یادِ الٰہی میں محو رہتے تھے، اپنا بھی ہوش نہ رہتا تھا۔

حضرت محبوبِ الٰہی نے یہ بھی فرمایا:-

وقتے مولانا بدرالدین اسحاق کہ تعویذ او نوشتے حاضر نہ بود و خلیفے بہجت تعویذ بروں آمدہ بودند، مرا اشارت کرد کہ تو بنویس من تعویذ نوشتم ناخلق انبوہ شد کتابت من بسیار شد و مزاحمت خلق بیشتر شد دریں میاں شیخ روئے سوئے من کردد فرمود کہ ملول شدی من گفتم کہ وقت شیخ حاضر است

(فوائدالفواد، صفحہ200)

ترجمہ:- ایک دفعہ مولانا بدرالدین اسحاق موجود نہ تھے جو حضرت بابا صاحب کے حکم سے تعویذ لکھا کرتے تھے، تعویذ لینے والے آئے ہوئے تھے، حضرت بابا صاحب نے مجھ سے

فرمایا کہ تم لکھو میں نے تعویذ لکھے تعویذ لینے والے بہت ہی آ جمع ہوگئے مجھے بہت ہی لکھنا پڑا مخلوق کے ہجوم سے کام میں رکاوٹ بھی ہوتی تھی حضرت بابا صاحب نے میری طرف رخ کیا اور فرمایا (کیا) تھک گئے، میں نے عرض کیا! آپ پر سب کچھ روشن ہے۔

حضرت محبوبِ الٰہی کے بیان سے واضح ہے کہ مولانا بدرالدین اسحاق کو بھی ہجوم خلائق سے دوچار رہنا پڑتا تھا جس میں خاصا وقت صرف ہوتا تھا، اس انہماک و مشغولیت کے باوجود دیگر امور بھی ان کے سپرد تھے، مہمانوں کی تواضع اور خدمت لنگر خانے کا انتظام و اہتمام بھی ان ہی کے سپرد تھا حتیٰ کہ لنگر خانے کے لئے جنگل سے لکڑیاں بھی لاتے تھے، (سیرالاؤلیا، صفحہ 176) پھر جو شخص اس قدر منہمک اور مشغول بکار ہو اور جس کے لئے حضرت بابا صاحب کی خدمت مقدم ہو اور خدمت بھی ایسی کہ اس سے دس آدمی بھی عہدہ بر آں نہ ہوسکیں اور ہمہ وقت مشغول بھی رہتا ہو، اس سے کتنی ضخیم کتاب کی تدوین متوقع ہوسکتی ہے لہٰذا جو کچھ بھی کیا وہ ان ہی کا کام تھا جو انہوں نے کیا دوسرا کوئی عہدہ براں نہ ہوسکتا تھا۔

واقعات شاہد ہیں کہ یہ مجموعۂ ملفوظات اسرارالاؤلیا مولانا بدرالدین اسحاق ہی کے رشحاتِ قلم کا ثمرہ ہے جو دست برو زمانہ سے ہم تک محفوظ نہیں پہنچا ہے لیکن جو کچھ ہے عقیدت مندوں کے لئے سرمۂ چشم اور سالکانِ راہ سلوک کے لئے خضر راہ ہے۔

کتابوں کے حوالے حضرت بابا صاحب کا مطالعہ وسیع اور حافظہ نہایت قوی تھا، آپ کو یہ یاد رہتا تھا کہ کس مضمون کا ماخذ کیا ہے لہٰذا آپ گاہِ بگاہ طالبوں کی رہنمائی کے پیشِ نظر جزوی یا کلی طور پر ماخذات کا ذکر بھی فرماتے رہتے تھے یہ روش ملفوظات میں عام ہے، عموماً ہر مجموعۂ ملفوظات میں ملتی ہے، اسرارالاؤلیا میں بھی متعدد ماخذات کا ذکر ہے مثلاً

(1) قاضی حمیدالدین ناگوری رحمۃ اللہ علیہ در تواریخ خود بنشستہ است (صفحہ 13۔4)

(2) خواجہ معین الدین سنجری رحمۃ اللہ علیہ جاءے بنشتہ است (صفحہ 5)

(3) در زاد المبین بنشتۃ دیدہ ام (صفحہ 8)

(4) خواجہ امام محمد طاہر غزالی غزالی در تواریخ خود بنشتہ است (صفحہ 13)

(5) در آثارالاألیا بنشتہ دیدہ ام (صفحہ 15)

(6) شیخ الاسلام شہاب الدین قدس اللہ سرہ العزیز فرمودہ است (صفحہ47)

(7) در سلوک بشتہ دیدہ ام (صفحہ 73۔47) (سلوک سے مراد کتاب سلوک اؤلیا)

(8) در عہد خواجہ جنید بغدادی قدس اللہ روحہ دیدہ ام (صفحہ 78۔47)

(9) در اسرارالعارفین بنشتہ دیدہ ام (صفحہ 50)

(10) در کتاب محبت بنشتہ دیدہ ام (صفحہ 53۔51)

(11) درحجۃ العارفین آمدہ است (صفحہ 52)

(12) خواجہ عبداللہ سہیل تستری رحمۃ اللہ علیہ جائے بنشتہ است (صفحہ 66)

(13) در سلوک الاؤلیا شنیدم از زبان خواجہ قطب الدین بختیار اوشی قدس سرہ العزیز (صفحہ 73)

تلاش و تفحص سے کچھ حوالے اور بھی ملتے ہیں، ماخذات کی یہ تعداد نہایت قلیل ہے، آٹھ سات کتابوں کے نام ہیں دیگر حوالہ جات کا تعلق ذاتی معلومات اور ذاتی مطالعہ سے ہے، حوالہ جات کا یہی عالم دیگر کتبِ ملفوظات میں ہے، خیرالمجالس میں اکتیس تو مستقل کتابوں کے نام ہیں اور متعدد حوالے ذاتی معلومات پر مبنی ہیں، خیرالمجالس میں ماخذات کا ذکر کچھ اس طرح ہے۔

(1) در کشاف نوشتہ است (صفحہ 83)

(2) در کتابے نوشتہ است (صفحہ 66)

(3) حجۃ الاسلام غزالی حکایت بزرگے نوشتہ است (صفحہ 95)

(4) عین القضاۃ در کتاب خود نوشتہ است (صفحہ 97)

(5) قول بزرگے فرموندہ (صفحہ 155)

(6) در عوارف است (صفحہ 155)

(7) از بزرگے روایت فرمودند (صفحہ (153)

(8) در رسالہ بنشتہ دیدہ ام (صفحہ 235)

(9) در فلاں کتاب نوشتہ است (صفحہ 239)

(10) در کتابے دیدہ ام (صفحہ 257)

متقدمین کی اکثر و بیشتر کتابیں نایاب و ناپید ہیں بعض کا پتہ نشان کشف الظنون (چیلپی) کی سی کتبِ حوالہ جات سے مل سکتا ہے لیکن کتب حوالہ جات بھی جزوکل پر حاوی نہیں ہوتیں، حال ہی میں پنجاب یونیورسٹی لاہور (پاکستان) سے تاریخ ادبیات مسلمانان پاکستان دہند نام سے کئی جلدیں شائع ہوئی ہیں لیکن متعدد کتابوں کا ذکر رہ گیا ہے جن کی طرف ماہنامہ معارف اعظم گڑھ، (جنوری و فروری 1980عیسوی) میں توجہ دلائی گئی ہے، اس کا مدعا یہ ہے کہ اگر بعض کتابوں کا ذکر نہیں ملتا تو یہ بدگمانی نہیں کی جاسکتی کہ یہ کتابیں جعلی و فرضی ہیں، اؤلیاءاللہ سے متعلق کتابوں کے باب میں تو یہ بدگمانی نہایت درجہ مکروہ ہے۔

اِنَّ بعض الظَّنِّ اِثّمٌ

بدگمانی کا مرتکب وہی ہوگا جو علمی قدروں سے نابلد ہوگا۔

الغرض اسرارالاؤلیا میں ماخذات کے جو حوالے ملتے ہیں وہ خیرالمجالس کے حوالوں سے زیادہ وقیع اور معتبر انداز میں ملتے ہیں، ان کے باب میں شک و شبہ کی گنجائش نہیں، تقریر و بیان میں حوالہ جات کی یہی روش ہے جو آج بھی ہے۔

اسفار و مشاہدات:- ملفوظات کا مطالعہ شاہد ہےکہ اؤلیاءاللہ کا یہ بھی معمول رہا ہے کہ وہ ملفوظات میں برمحل اپنے اسفار و مشاہدات کا ذکر فرماتے رہے ہیں، حضرت محبوبِ الٰہی کے اسفار نہایت قلیل ہیں، بدایوں سے دہلی اور دہلی سے اجودھن (پاک پٹن) مگر آپ نے ان مختصر اسفار و مشاہدات کا بھی ذکرِ خیر فرمایا ہے جو فوائدالفواد اور سیرالاؤلیا کے اوراق کی زینت ہے یہ صورتِ حال اس پر دلالت کرتی ہے کہ یہ بھی حضرت بابا صاحب کے اسفار و مشاہدات کی اور دیگر مشائخِ عظام ہی کی اتباع ہے، حضرت بابا صاحب کے اسفار و مشاہدات کا ذکر اسرارالاؤلیاء میں بھی ہے اور راحت القلوب میں بھی ہے، ممکن ہے کہ حضرت بابا صاحب کے ملفوظات کے ان مجموعات میں بھی ہو جو اب نایا ب ہیں، فوائدالفواد میں بیشک حضرت بابا صاحب کے ان سفروں اور مشاہدوں کے ذکر کو دہرایا نہیں گیا ہے جن کا تعلق دیگر ممالک سے ہے، فوائدالفواد نہ تو حضرت بابا صاحب کے ملفوظات کا مجموعہ ہے نہ حضرت بابا صاحب کی سوانح حیات ہے، نہ وہ کوئی انسائیکلو پیڈیا ہی ہے کہ اس میں وہ کچھ ہوتا ہے جو عموعی کتابوں میں ہوا کرتا، البتہ وہ صحیفۂ رشد و ہدایت ہے طالبانِ سلوک کے لئے مگر کیا اس میں سلوک سے متعلق سب ہی کچھ ہے پھر اگر حضرت بابا صاحب کے اسفار و مشاہدات کا ذکر نہیں ہے تو وہ نفی اسفار کی دلیل کیسے ہوسکتی ہے، لزوم مالا یلزم بے معنی سی بات ہے۔

حضرت بابا صاحب کے جن سفروں کا ذکر اسرارالاؤلیا کے اوراق کی زینت ہے وہ یہ ہیں، ملک بابا (مقام سوتہ) بغداد، غزنی، طرف شام، بدخشاں، سیوستان، بدایوں، لاہور، ان کے علاوہ بھی دیگر معتبر ماخذات میں دیگر سفروں کا ذکر ملتا ہے، مثلاً اجمیر، دہلی، ہانسی، ملتان، اُچ، فریدکوٹ، علاقۂ سہارن پور، مارواڑ، بخارا، اور قندھار۔

عہد وسطیٰ میں سیاحت مشائخِ عظام کا خصوصی مشغلہ تھا، خواجہ عثمان ہراونی، خواجۂ بزرگ خواجہ معین الدین سنجری، خواجہ قطب الدین بختیار اوشی، قاضی حمیدالدین ناگوری، شیخ جلال الدین تبریزی، شیخ بہاؤالدین زکریا ملتانی، شیخ سعدی شیرازی متواتر حرکت میں رہے اور اس میں پُر آشوب زمانے میں بھی عزالت گزیں نہ ہوئے، اس باب میں حضرت بابا صاحب بھی ان ہی بزرگوں کے ہم ردیف رہے اور سیر و سیاحت کے فوائد سے مستفید ہوئے۔

تاریخی وقائع:- ہر کتاب کا ایک موضوع اور نصب العین ہوتا ہے اور وہ اس علم دفن سے متعلق ہوتا ہے جس سے وہ متعلق ہوتی ہے اگر ضمناً دیگر علوم و فنون سے متعلق کچھ شامل ہوئے اور وہ مربوط بھی ہوجائے تو کچھ مضائقہ نہیں، ایسا خال خال ہی ہوتا ہے ورنہ ہر کتاب اپنے فن سے متعلق رہتی ہے، فلسفہ، منطق، ریاضی، سائنس، دینیات، تصوف، ان علوم سے متعلق جو کتابیں ہوں گی، ان میں تاریخی وقائع کی تلاش بے سود اور لاحاصل ہے، کتبِ ملفوظات کی نوعیت بھی یہی ہے کہ اذہان دنیاوی زق زق و بق بق میں مبتلا نہ ہوں، چنانچہ فوائدالفوائد اور خیرالمجالس میں بھی ان کے عہد تالیف کے تاریخی وقائع نہیں ملتے لیکن یہ عجوبۂ روزگار ہے، اسرارالاؤلیا میں مختصر سی دو تاریخی وقائع ملتے ہیں۔

1. سلطان ناصرالدین محمود کا سفر ملتا ہے (655 ہجری) صفحہ 82

2. اُچ پر مغلوں کی یورش اور والیٔ ملتان شیر خان کا مارا جانا (662 ہجری) صفحہ 69

اس اعتبار سے بھی اسرارالاؤلیا کو دیگر کتبِ ملفوظات پر فوقیت حاصل ہے۔

داخلی کیفیات:- اسرارالاؤلیا اگرچہ دستبرد زمانہ سے محفوظ نہیں لیکن اس سے انکار نہیں کیا جاسکتا کہ وہ حضرت بابا صاحب کے ملفوظات کا مجموعہ ہے، صدہا سال گزرنے کے باوجود آج بھی اس میں وہ کیفیت اور دل آوزیزی ہے جو بیان میں سما نہیں سکتی، بار بار پڑھنے سے کیفیت میں متواتر اضافہ ہوتا رہتا ہے، ذرا بھی کمی نہیں آتی پڑھنے والا نئی سے سے نئی کیفیت سے لطف اندوز ہوتا رہتا ہے، کبھی کسی بیان سے اور کبھی کسی بیان سے پڑھنے والے پر لگاتار کچھ ایسی کیفیت طاری ہوتی رہتی ہے کہ وہ اپنے کو ہر بار کسی اور ہی عالم میں پاتا ہے، محسوس کرتا ہے، کیفیت و ذوق سے طبیعت ایسی متکیف رہتی ہے کہ گویا وہ نغمۂ الست میں کھو سا گیا ہے اور کوثر و تسنیم کی موجوں سے کھیلنے سا لگا ہے، کیفیت و سرور کے عالم میں مدہوش و بے خبر ہے اور اسی عالم میں رہنا چاہتا ہے، کبھی عالم سرور و بے خودی میں گنگنانے لگتا ہے:-

مومن آ کیش محبت میں کہ سب کچھ ہے روا

حسرتِ حرمت بادۂ و مزامیر نہ کھینچ

ضرورت حاضرہ کے پیشِ نظر میں نے اسرارالاؤلیا کا از سر نو مطالعہ کیا، کیا بتاؤں میں نے کیا پیا کئی مقام ایسے آئے کہ روح میں اہتراز پیدا ہوگیا جی بھر آیا، آنکھوں سے آنسو ٹپک پڑے، حسرت و حیرت طاری ہوگئی، دل دنیا سے بیزار کچھ اور ہی چاہنے لگا، سب سے حیرت انگیز یہ ہے کہ یہ بھی پتہ نہ چلا کہ یہ کیفیت و سرور، یہ سرمستی کس لفظ کس جملے یا کس عبارت سے حاصل ہوئی ہے، کہہ لیجئے کہ تدریجی طور سے جو کیفیت فراہم ہوتی رہی ہے جب پیمانہ لبریز ہوگیا تو چھلک پڑا ہے۔

بلا مبالغہ یہ کہا جاسکتا ہے کہ اسرارالاؤلیا از اول تا آخر کیف و مستی، شریعت و طریقت، ادب و زبان، نور و عرفان اور صداقت و دلربائی کا بے مثل مرقع ہے دیرینہ روزی کے اثرات سے متاثر ہونے کے باوجود تاثیر کا نشتررگ جان میں پیوست ہوتا ہے چلا جاتا ہے اگرچہ وہ زبانِ حال سے عقیدت مندوں کی سردمِہری اور بے اعتنائی کی نوحہ خوان بھی ہے کہ وہ صحت و مقابلہ سے مزین ہوکر منظر عالم پر نہ آسکی جس کی اشد ضرورت ہے۔

عرفاءِ کاملین میں رشد و ہدایت کو بڑی اہمت ہے اور وہ اس باب میں ضعیف سے ضعیف حدیث کو بھی روا رکھتے ہیں اور اس سے کام لینےمیں تکلف نہیں برتتے وہ طبیب روحانی ہوتے ہیں، حاذق اطباء سے بھی اس باب میں ان کا مقام بلند ہے وہ دل کی نبض پر انگلی رکھتے ہیں اور تشخیص و تجویز کرتے ہیں اور تدبیر فرماتے ہیں جس طرح حاذق و طباء کو ان ادویہ سے کام لینے کا استحقاق ہے جو عام حالات میں شرعاً ممنوع اور حرام و نا روا ہیں اسی طرح عرفا بھی بوقت ضرورت ان تدابیر کو اپنا لیتے ہیں جنہیں علمائے شریعت وقیع نہیں جانتے اور ان سے اجتناب برتتے ہیں۔

خوارقِ عادات اور محیر العقول نقلیں اور تمثیلیں بالطبع انسان کو مرغوب ہیں، عرفائے کاملین نے ان سے بھی کام لیا ہے انوارِ سہیلی (کلیہ و منہ پنجتن تر) منطق الطیر اور مثنوی معنوی تمثیلی بیان کے شاہکار ہیں جن کی حکایتوں اور تمثیلوں سے اہم اخلاقی نتائج بر آمد ہوتے ہیں جن سے دل و دماغ کی کایا پلٹ جاتی ہے، حیرت انگیزی کا وصف دلوں کو موہ لیتا ہے اور آمادۂ عمل بنا دیتا ہے، اسرارالاؤلیا اس وصف سے خالی نہیں، اگر اس کو اسرار متحیرین سے تعبیر کیا جائے تو بے جانہ ہوگا اور اسرارالاؤلیا ہی کیا عہد وسطیٰ کا جملہ ادب مشرقی ہو یا مغربی اس وصف سے مالا مال ہے اگر اسرارالاؤلیا میں وصف نہ ہوتا تو نگاہِ تحقیق میں یہ اس کا وصف نہ ہوتا سقم ہوتا۔

یہ صحیح نہیں کہ محیرالعقول واقعات سے ناممکنات کے یقین کا نقش جمانا مقصود ہوتا ہے بلکہ مقصود ہوتا ہے اس کا اثر و نتیجہ اور در اصل اسلوب کی جاذبیت اور کشش مراد ہوتی ہے، بہر نوع دیرینہ روزی کے اثرات سے متاثر اور دستبرد زمانہ کے اثرات سے دو چار رہنے کے باوجود مجموعۂ ملفوظات اسرارِالاؤلیاء خوبیوں سے مالامال اور لائق مطالعہ و استفادہ ہے، البتہ ضرورت ہے کہ صحت و مقابلہ سے آراستہ کر کے اسے منظر عام پر لایا جائے تاکہ معاشرہ میں ایمانی تنوع رونما ہو اور حقیقی راہنمائی حاصل ہوسکے۔