حضرت شیخ برہان الدین

حضرت شیخ برہان الدین علومِ ظاہری و باطنی میں یکتا تھے۔

بیعت و خلافت : آپ حضرت شاہ قاضن کے مرید اور خلیفہ ہیں۔

پیر و مرشد کی دعا : آپ شاعر بھی تھے، ایک مرتبہ آپ نے اپنے پیر و مرشد سے عرض کیا کہ حضرت امیر خسرو کو سلطان المشائخ خواجہ نظام الدین اؤلیا کی دعا سے وہ فیض پہنچا کہ جس کی کوئی حد و حساب نہیں اور ان کے کلام میں وہ اثر پیدا ہوا کہ ان کا کلام مقبولِ خاص و عام ہوا پھر آپ نے اپنے پیر و مرشد سے یہ درخواست کی کہ

”میرے لیے دعا کیجیے کہ میرا کلام مجاز سے نکل کر حقیقت کے درجہ کو پہنچے“

آپ کے پیر و مرشد نے جواب دیا کہ

”کلامِ ربانی سے تمہارے اعتقاد کے موافق تم کو بھی کچھ دیا گیا“

پیر و مرشد کی دعا نے اپنا کام کیا اور اس روز سے آپ کے کلام میں مٹھاس پیدا ہوئی اور کلام مقبول ہوا۔

سیرت : آپ عالمِ باعمل تھے، درویش دلریش تھے، درس و تدریس اور رشد و ہدایت میں زیادہ وقت گزارتے تھے، آپ نے اسی کتابیں لکھی ہیں لیکن کتابوں کا پتہ نہیں چلتا۔