جدید قوالی اور موسیقی

پہلے تو قوالی کی دھنیں بہت مخصوص اور محدود تھیں، ان ہی دھنوں میں کلام کی رد و بدل سے قوال حضرات کام چلایا کرتے تھے لیکن بیسویں صدی کی تیسری چوتھائی میں قوالی کے میدان میں چند ایسے فنکار بھی آ گیے جو قوالی کو نت نئی دھنوں سے آراستہ کرنے میں مشغول ہو گیے بلکہ موسیقی کی حد تک ان فنکاروں نے اتنی ترقی کر لی کہ وہ قوالی کے میدان سے ہٹ کر فلموں میں بھی باضابطہ موسیقار اور گائک کی حیثیت سے کام کرنے لگے۔

فی الحال قوالی کی نئی نئی دھنیں حِس سماعت پر بہت خوش کن اثرات مرتب کر رہی ہیں، جس کے باعث ان کی مقبولیت دن بدن بڑھتی ہی جارہی ہے لیکن اس تجربہ کی حقیقی کامیابی ناکامی کا اندازہ کچھ وقت گذارنے کے بعد ہی ہو سکے گا، کیوں کہ ان نئی نئی دھنوں سے بہر حال قوالی کے بول مجروح ہو رہے ہیں یعنی لفظوں کا حسن تلفظ، اشعار کی طرز اور مضامین کی معنویت متاثر ہو رہی ہے، ویسے میرا ذاتی تجربہ ہے کہ وہی نغمے عمرِ طویل پاتے ہیں جن کی بنیاد اچھے کلام پر ہوتی ہے۔