حضرت وارث شاہ

نام و لقب : پنجابی زبان کے عظیم صوفی شاعر اور ”ہیر“ کے خالق و مصنف وارث شاہ کا پورا نام سید محمد وارث شاہ تھا، آپ نے شاعری میں اپنا نام ”وارث شاہ“ اخیتار کیا اور بعد ازاں اسی نام سے معروف و مشہور ہوئے، آپ کا تعلق سید گھرانے سے تھا۔

پیدائش : پنجاب کے ممتاز شاعر اور ممتاز صوفی بزرگ وارث شاہ شیخو پورہ کے نواحی قصبہ جنڈیالہ شیر خان میں 1720 بمطاطق 1132 ہجری پیدا ہوئے، آپ کے والد محترم کا نام سید قطب شاہ تھا، وارث شاہ کے بھائی کے پڑپوتے سے سید حیات شاہ کے مطابق آپ کے والد نام سید گل شیر تھا مگر یہ امر درست ہے کہ آپ کے والد کا اصل نام سید قطب شاہ تھا اس کی تصدیق خود انہوں نے اپنے مصرع میں کی ہے۔

بناں عمل دے نہیں نجات تیری

ماریا جائیں گا قطب دیا بیٹیاں اوئے

شجرۂ نسب : وارث شاہ کا شجرۂ نسب درج ذیل ہے، سید قطب شاہ، سید وارث شاہ، سید بہادر شاہ، سید قاسم شاہ، سید قادر شاہ، سید شاہ حسن، سید گلاب شاہ، سید ولایت شاہ، سید جیون شاہ، سید نادر شاہ۔

ابتدائی تعلیم : وارث شاہ نے ابتدائی تعلیم اپنے والد قطب شاہ سے حاصل کی لیکن جب جوان ہوئے تو شہر قصور کی مسجد کوٹ قصور کا رخ کیا اور حافظ غلام مرتضیٰ کی خدمت میں پیش ہوئے، آپ نے مولوی غلام محی الدین سے ابتدائی تعلیم حاصل کی، وہ خود لکھتے ہیں کہ

وارث شاہ وسنیک جنڈیا لڑے داتے شاہ گرد مخدوم قصور دا اے

ظاہری علوم میں دسترس حاصل کرنے کے بعد وارث شاہ قصور سے رخصت ہوئے اور بابا فرید گنج شکر کے مزار پر پہنچ گئے جہاں انہوں نے باطنی فیض حاصل کیا اور آپ نے اس وقت گدی نشین مخدوم جہانیاں کی بیعت کی، باطنی علوم حاصل کرنے کے بعد آپ پاک پٹن سے ملکہ ہانس چلے گئے اور آپ نے ایک مسجد میں پانچوں وقت کی امامت کروائی، بعد ازاں پاک پٹن سے چل کر ٹھٹھہ زاہد چلے گئے۔

وارث شاہ کے بزرگان : ان کا تعلق حضرت امام نقی کی اولاد میں سید علی اصغر کے بیٹے سید اسماعیل کی آٹھویں پشت میں سید سلطان محمد مکی کے بیٹے صدرالدین کی اولاد میں سے تھا، 1260 عیسوی میں سلطان محمد مکی ایران سے آکر بھکر میں آباد ہوئے۔ (پنجاب رس صفحہ 90 از تنویر بخاری)

پیدائش : وارث شاہ جنڈیالہ شیر خاں (شیخو پورہ) میں پیدا ہوئے، آپ کی پیدائش کے بارے میں مختلف آرا پائی جاتی ہیں۔

1۔ مقصود ناصر چودھری مرحوم (مصنف تاریخ شیخوپورہ) کے مطابق۔ 1150 ہجری 1738 عیسوی

2۔ باوا بدھ سنگھ کے مطابق 1126 ہجری تا 1140 ہجری

3۔ مولانا بخش کشتہ مرحوم (پنجابی شاعراں واتذکرہ) 1135 ہجری تا 1140 ہجری

4۔ چودھرتی محمد افضل خاں مرحوم (ایڈیٹر پنج دریا) 1130 ہجری تا 1140 ہجری

5۔ خوشونت سنگھ تے ایس ایس امول 1149 ہجری 1737 عیسوی

6۔ ایس ایس کوہلی 1148 ہجری 1736 عیسوی

7۔ ڈاکٹر اختر جعفری 1114 ہجری یا 1730 عیسوی کے قریب

8۔ ڈاکٹر جیت سنگھ سیتل 1133 ہجری تا 1210 ہجری 1720 عیسوی تا 1797 عیسوی

9۔ شریف صابر (ہیر) 1986 عیسوی (پنجاب رس صفحہ 91) 1134 ہجری تا 1215 ہجری (1722 عیسوی تا 1798 عیسوی)

10 حفیظ تائب (کھوج شمارہ 16-15 (1122ہجری) 1710 عیسوی

11۔ سید سبط الحسن ضیغم 1132 ہجری 1720 عیسوی

12۔ تنویر ظہور (روزنامہ جنگ، لاہور) 1134 ہجری 1722 عیسوی

13۔ شائستہ نزہت و سیر 1132 ہجری 1720 عیسوی

14۔ خالد پرویز ملک (مصنف تاریخ شیخ پورہ، ذکر وارث شاہ) 1132 ہجری 1720 عیسوی

15۔ پروفیسر غلام رسول آزاد (پرنسپل گورنمنٹ کالج شیخو پورہ) 1122 ہجری 1710 عیسوی

یہ سارے اندازے آرا، خیالات ہیر وارث شاہ کی تاریخ 1180 ہجری کو نظر رکھ کر لگائے گئے ہیں، یعنی

سن یاراں سو ای آنبی ہجری

لمے دیس دے وچ تیار ہوئی۔

اس طرح یہ امر طے شدہ ہے کہ وارث شاہ کی ٹھیک ٹھیک تاریخ یا سال پیدائش کا کسی کو بھی معلوم نہ ہے۔

ولدیت کے نام کا اختلاف : وارث شاہ کی ولدیت کے بارے میں ”ہیر وارث شاہ“ کو سامنے رکھ کر کچھ لوگوں کا خیال ہے کہ آپ کے والد محترم کا نام قطب شاہ تھا، بحوالہ شعر

بناں عمل دے نئیں بجات تیری

ماریا جائیں گا قطب دیا بیٹیا اوئے

تیویر بخاری نے جدید تحقیق کی تو وارث شاہ کے خاندان کے موجودہ وارثان سے ملاقات کر کے یہ نتیجہ اخذ کیا کہ ان کے شجرۂ نسب کے مطابق آپ کے والد کا نام ”سید گل شیر شاہ“ تھا، تنویر بخاری اپنی تحقیق درست قرار دیتے ہیں کیونکہ ”قطب دیا بیٹیا“ والی شہادت یقینی نہیں ہے بلکہ غوث، قطب، ابدال اور اوتاد وغیرہ محاوارتی تعلقات کے طور پر استعمال کیا گیا، تنویر بخاری نے وارث نمبر ماہنامہ پنج دریا، لاہور بابت ماہ اکتوبر نومبر 1969 میں وارث شاہ کے خاندانی بزرگ سید خیرات شاہ کی معرفت آپ کا شجرہ نسب یوں بیان کیا کہ

گل شیر شاہ کے تین بیٹے تھے۔

1۔ وارث شاہ (روایت ہے کہ وارث شاہ صرف ایک بیٹی کے باپ تھے) بحوالہ یادرگار وارث از ضیا محمد ضیا)

2۔ قاسم شاہ

3 بہادر شاہ (ان میں سے قاسم شاہ کے دو بیٹے تھے)

1۔ بہادر شاہ۔ 2۔ قادر شاہ (ان مین سے بہادر شاہ کے بیٹے حسن شاہ تھے جن کے چار بیٹے تھے)

1۔ گلاب شاہ۔ 2۔ ولایت شاہ۔ 3۔ جیون شاہ۔ 4۔ نادر شاہ

(گلاب شاہ کے بیٹے عنایت شاہ تھے، عنایت شاہ کے بیٹے خیرات شاہ 1969 میں گدی نشیں تھے)

جنڈیالہ شیر خاں، ضلع شیخو پورہ : اس قصبہ میں غزنی کے پٹھان شیر خاں نامی شخص رہائش اختیار کی اور 1556 میں جنڈیالہ شیر خاں کی بنیاد رکھی، شیر خان مرحوم نے 1568 عیسوی میں اپنے مرشد سخی احمد درویش کے حکم سے ایک باؤلی تعمیر کروائی، جس پر قطعہ تاریخ فارسی زبان میں لکھا ہوا تھا، اس تاریخی پتھر کی تختی کو قومی تاریخی اثاثہ سمجھ کر ضلع شیخو پورہ کے اس وقت کے ڈپٹی کشمنر محمد افضل کہوٹ کے حکم سے 1972 میں اکھاڑ کر لاہور میوزیم میں محفوظ کروا دیا، مذکورہ باؤلی جون 1568 میں تعمیر ہوئی تھی، یہ ایک قدیم قصبہ تصور کیا جاتا ہے، اب یہ ضلع شیخو پورہ میں شامل ہے، 1922 سے قبل جنڈیالہ شیر خان ضلع گوجرانوالہ میں شامل تھا، بیان کیا جاتا ہے کہ اس مقام پر جنڈ کے درخت بہت زیادہ تعداد میں موجود تھے، اس مناسبت سے جنڈاں والا (جنڈاں آلا) اور بعد ازاں جنڈیالہ مشہور ہوگیا۔

تختی پر کندہ اشعار

بعہدِ شہنشاہ اکبر لقب ہمایوں نسب خسروے کامیاب

بفرمودہ سید غزنوی رفیع المکاں خان عالی جناب

بنا کرو ”وائے“ زیمن کرم کہ شد رشک سرچشمۂ آفتاب

زو کوش بود دلوگردوں خجل ز چرخش بود چرغ در پیچ وتاب

زتاریخ او گفت ہاتف بمن ”بہ از چاہ نخشب“ بگو در جواب

(بہ از چاہ ”نخشب“ اسلامی تاریخ 976 ہجری برآمد ہوتی ہے)

وارث شاہ کی اولاد : بزرگان بیان کرتے ہیں کہ وارث شاہ کی شادی ہوئی تھی اور اللہ تعالیٰ نے انہیں ایک بیٹی دی تھی، بعد ازاں ان کے بارے میں کوئی معلوم نہ ہوسکا، جنڈیالہ شیر خان کے بارے میں سچی تاریخی خبر جنڈیالہ شیر خان ہائی اسکول (سابقہ مڈل اسلول) کے ایک استاد خان غلام رسول خان نے روزنامہ ”امروز“ لاہور میں 12 جون 1974 عیسوی کے شمارے میں ”ایڈیٹر کی ڈاک“ صفحہ پر بھرپور انداز میں شائع کروائی تھی، غلام رسول خان مرحوم کا ایڈیٹر کے نام خط من و عن تاریخی حوالہ سمجھ کر دیا جارہا ہے جس کو قدر آفاقی نے اپنی کتاب ”وارث شاہ دا بولنا بھیت اندر“ جو کہ ہیر وارث شاہ کے عارفانہ رنگ کی مکمل شرح ہے صفحہ نمبر 8-7 میں شائع کیا، اس خط سے تاریخی حقیقت بھی سامنے آتی ہے کہ جنڈیالہ شیر خان کا پہلا نام ”شیر کوٹ“ تھا، بعد میں جنڈو ورک اس کی ایک آبادی میں رہائش اختیار کرکے اس کا نام جنڈو والا رکھا تھا لیکن کتبہ باؤلی (فارسی زبان میں) جس کا ذکر خط میں بھی موجود ہے یہ بات روز روشن کی طرح عیاں ہے کہ اس کتبے کے شعر 1568 میں لکھے تھے تھے، اس وقت اس جگہ کا نام جنڈیالہ شیر خان ہی تھا۔

وارث شاہ وسنیک جنڈیا لڑے دا

روزنامہ”امروز“ لاہور 12 جون 1974 میں ایڈیٹر کے نام ایک خط : مکرمی تسلیم! جس طرح لاہور کو داتا کی نگری کہا جاتا ہے، اسی طرح جنڈیالہ شیر خان کو وارث شاہ کی نگری کے نام سے یاد کیا جاتا ہے، دیہہ ہذا ہی پنجابی زبان کے مشہور شاعر پیر وارث شاہ صاحب کا مولد ومد فن ہے، ان کی تصنیف ”ہیر“ پنجابی شاعری کا شاہکار سمجھی جاتی ہے، جنڈیالہ شیر خان قلعہ شیخو پورہ سے شمال کی طرف نومیل دور پکی سڑک پر واقع ہے، اس کی آبادی 5-4 ہزار افراد پر مشتمل ہے جس میں پٹھان اور کھوکھر دو قابلِ ذکر قومیں آباد ہیں، یہاں آثارِ قدیمہ میں ”واں“(باؤلی) مسجد تالاب، مقابر و مزارات ہیں، جنڈیالہ شیر خان آج سے چار سو سال پہلے شیر خان نامی بڑیچ پٹھان نے آباد کیا تھا جو شہنشاہِ اکبر کے زمانے میں باعزت افسر تھا، شیر خان اور فتح خاں دونوں بھائی قندھار کے سردار تھے، فتح خان قندھار کے نواح میں شہید ہوگیا مگر شیر خاں قندھار سے نقل مکانی کر کے پنجاب آگیا، شیر خان جب مودہ جنڈیالہ شیر خان کی سرزمین پر وارد ہوا تو یہاں ایک خدا رسیدہ بزرگ سید احمد دوریش غزنوی (جن کا مزار واں (باؤلی) کے پاس ہی ہے) سے ملاقات ہوئی، درویش صاحبِ مذکور نے یہاں پانی کی نایابی کا شکوہ کیا جس پر شیر خان نے واں (باؤلی) یعنی کنوری اور اس پر بارہ دری سیر گاہ کی حیثیت میں نبائی اور ساتھ ہی مسجد میں تعمیر کرا دی، جیسا کہ واں (باؤلی) کے کتبہ سے ظاہر ہے، یہ کتبہ آج کل عجائب گھر لاہور میں رکھا ہے، اس کتبہ پر واں کی تاریخ تعمیر 976 ہجری مطابق 1568 عیسوی کندہ ہے، واں (باؤلی) کی تعمیر سے 10 سال بعد شیر خان اپنے کنبے سمیت یہاں آباد ہوگیا اور اپنے نام پر اس بادی کا نام شیر کوٹ رکھا۔

سات نسکل تک آباد رہنے کے بعد یہ علاقہ قتل و غارت کی آماجگاہ بن کر برباد ہوگیا اور شیر خاں کا کنبہ بھی یہاں سے نقلِ مکانی کر کے کسی امن جگہ چلا گیا، خود شیر خاں کی شہادت کٹھوئیہ ضلع علاقہ پر راجہ رنجیت سنگھ کے ایک سردار مہتاب سنگھ نے قبضہ کرلیا کچھ عرصہ بعد سردار جہاں سنگھ نے اس علاقہ کو فتح کر کے سردار روڑا سنگھ کڑیالیہ کو جاگیر میں بخش دیا جب یہاں امن کی صورت پیدا ہوئی تو شیر خان کا کنبہ دوبارہ آکر آباد ہوگیا اور اب تک اس گاؤں کا نام شیر کوٹ ہی تھا مگر کچھ عرصہ بعد اس کے ایک حصہ پر جنڈو ورک نے اپنی آبادی قائم کر کے اس کا نام ”جنڈو والہ“ رکھا چند سال بعد بہادر نامی راجپوت کھو کھر نے کچھ حصہ کو آباد کیا انہی ایام میں کابل میں سہگل کھتری قبیلہ شور کوٹ سے آکر آباد ہوا پھر چند سال بعد یہ سب بستیاں اکٹھی ہوکر ایک بستی بن گئی جس کا نام جنڈیالہ شیر خاں مشہور ہوگیا، مسٹر نہال چند نے جو تاریخِ پنجاب فارسی زبان میں لکھی ہے اس نے بھی مہاراجہ رنجیت سنگھ کا قیام جنڈیالہ شیر خان میں دکھا یا ہے۔

اس مختصر تاریخ لکھنے کا مقصد یہ ہے کہ اکثر تاریخ نگار جنڈیالہ شیر خان کی واں (باؤلی) کو شیر شاہ سوری کی تعمیر بتاتے ہیں حالانکہ یہ صریحاً غلط ہے کیونکہ شیر شاہ سوری کا عہدِ حکومت 1540 عیسوی تا 45 عیسوی ہے اور یہ واں (باؤلی) 1567 عیسوی شہنشاہِ اکبر کے زمانہ میں مرہون تعمیر ہوئی جیسا کہ اس کے کتبہ سے ظاہر ہے آغاز میں تحریر کیا جا چکا ہے کہ یہ کتبہ آج کل عجائب گھر، لاہور کی زینت ہے جسے 1972 عیسوی میں جناب محمد افضل کہوٹ ڈپتی کمشنر شیخو پورہ کے حکم سے اکھاڑ کر وہاں پہنچا دیا گیا ہے۔

تعلیم : وارث شاہ نے اسلامی تعلیم قصور سے مکمل کی لیکن روحانی منازل طے کرنے کے لیے بابا فرید گنج شکر کے مزار پر اس وقت کے سجادہ نشیں سے بیعت حاصل کی، اس میدان میں کامیابی کے بعد وہ ملکہ ہانس (ضلع ساہی وال) پہنچے جہاں عشق کی آگ نے آتش جوان کیا، اس قصے کے مجازی اور حقیقی کرداروں کی وضاحت کے لیے 8 شعر لکھے لیکن وارث شاہ نے اس کے ساتھ ہی مجازی رنگ قائم رکھا، بزرگوں کی دعاؤں سے اپنے دلی خلوص سچی محبت اور محنت کا شاہکار ”ہیر رانجھا“ اور ”وارث شاہ“ کو ہمیشہ کی زندگی مل گئی، جس کی ہر کوئی تعریف کرتا ہے۔

وارث کی تصنیفات : ہیر رانجھا وہ قصہ ہے جس کی وجہ سے وارث شاہ کو ہمیشہ کی زندگی نصیب ہوگئی اور ہیر وارث شاہ کو بھی ہمیشہ کا جیون دان ہوگیا لہٰذا یہ دونوں لازم اور ملزوم ہبن کر ابھرے، حالانکہ وارث شاہ سے پہلے اور بعد کے شاعروں نے بھی ہیر رانجھے کا قصہ ضرور لکھا، میاں ہدایت اللہ کی مرتب کردہ ”ہیر“ میں وارث شاہ کی دو تصنیفات شامل ہیں یعنی معراج نامے اور عبرت نامے لیکن میاں پیراں دتہ تڑ گڑ کی مرتب کردہ ”ہیر“ میں عبرت نامہ کی جگہ اشتر نامہ اور کچھ دوہڑے موجود ہیں۔

سسی وارث شاہ : موہن سنگھ دیوانہ نے اپنی مرتبہ کردہ ہیر وارث شاہ کے دیباچے میں سسی وارث شاہ کا ذکر کیا ہے جس کو مدرسہ تعلیم القرآن، انار کلی، لاہور کے ایک استاد حکیم عبدالقادر نے شائع کروایا تھا، حکیم صاحب نے اس میں لکھا کہ سسی وارث شاہ کا مسودہ ان کے بزرگوں سے 1221 ہجری میں آیا جو ان کے جدی پشتی کتب خانے میں محفوظ تھا، چنانچہ انہوں نے یہ قصہ شائع کروایا، اس قصے میں احمد شاہ ابدالی تا شاہ نواز کے حملہ کا ذکر ہے۔

معراج نامہ : معراج نامہ چھوٹی بحر میں ہے جس کا پہلا بند اس طرح ہے، معراج نامے میں حروف مقطعات اور قرآنی الفاظ کا استعمال کافی نظر آتا ہے۔

حمدِ الٰہی آکھ زبانوں ثابت ہو کے دلوں جانوں

تاں کجھ بخرہ (حصہ) ملے ایمانوں ثمرہ شکر گزری دا

بعد درود سید ابراراں آل اتے صحاباں یاراں

رحمت اپر نیکو کاراں راہ ایہہ تابعداری دا

نصیحت نامہ : یہ بھی معراج نامہ کی طرح چھوٹی بحر میں ہے جس میں نصیحتوں کا رنگ ابھرتا ہے۔

اللہ باقی عالم فانی سرور عالم یار حقانی

چھوڑ گئے فرقان نشانی باغ رہیا گلزاری دا

بھانویں سہے برساں کوئی جیوے اوڑک موت پیالہ پیوے

وارث شاہ عمل نہ کیتے چنگے بے پرواہی کو لوں سنگے

نت دعا فضل دی منگے رحم کریں میں ماری دا

چوہڑ ٹیڑی نامہ : چوہڑی پنجاب کے دیہاتوں اور شہروں میں صفائی کرنے والا کردار ہے جو کہ اپنی ذات میں بہت معمولی ہے اور معزز شمار نہیں کیا جاتا، چنانچہ صوفیائے کرام نے تکبر اور غرور سے بچنے کے لیے اور نفس کی شرارتوں سے محفوظ رہنے کے خود کو اللہ تعالیٰ اور محمد مصطفیٰ صلی اللہ علیہ وسلم کے دربار کی چوہڑی صفائی کرنے والی، جھاڑو دینے والی عورت کا روپ پیش کیا، جس کا مقصد چودھری قسم کے لوگ کمی کمین لوگوں کو خدا کے بندے اور انسان سمجھ کر ان کی عزت کریں، وارث شاہ نے بھی اپنی ”میں“ کو اللہ تعالیٰ کی عظمت اور رسول اکرم صلی اللہ علیہ وسلم کی اعلیٰ اور سچی شان کے مقابلے میں چوہڑ ٹیڑی نامہ لکھا، جس میں سب لوگوں کے لیے غرور تکبر اور جھوٹی شان سے بچنے کا سبق ملتا ہے جو لوگ وارث شاہ کو صوفی شاعر کہتے ہیں وہ ان خیالات کی وجہ سے وارث شاہ کو ایک صوفی شاعر کے روپ میں جانتے ہیں لفظ چوہڑی میں معاشرتی کراہت تھی، اس کو ”چوہڑ ٹیڑی“ کرنے سے وہ اکراہت ختم ہوگئی اور اس کی جگہ محبت کے جذبے نے لے لی، جس پر چوہڑی کا کردار معاشرے میں کراہت کا کردار نہ رہا، وارث شاہ نے یہ لفظ اختیار کرکے انسانی عظمت کو اجاگر کیا، قرآن مجید میں ارشاد ہے، ولقد کرمنا بنیَ آدمَ یعنی ہم نے بنی آدم کو عزت بخشی ہے،چوہڑ ٹیڑی نامہ کا نمونہ۔

اللہ پاک محمد ہادی بخشن ہار گناہاں

ابوبکر عمر عثمان علی خدمت گار چواہاں

میں میں کردی کٹھی بکری الٹا کھل لہائی

عز رائیل نوں خود یوں گل وچ لعنت طوق پہنائی

وارث مینا ”میں نہ“ آکھے شاہاں تخت بٹھائی

باراں ماہ : بعض نقادوں کا خیال ہے کہ ”باراں ماہ“ وارث شاہ جو کہ موضع لویر ضلع گوجرانولہ کا رہائشی تھا ان کا تحریر کردہ ہے لیکن بشیر حسین ناظم کا خیال اس سے بالکل مختلف ہے وارث شاہ جنڈیالوی کے باراں ماہ میں ساون ماہ کا ذکر اس طرح کیا ہے۔

چڑھیا ساون ماہ عذاب والا نبھ ماپیاں نے ڈولی پائیاں میں

رورو بہتریڑے شور کیتے قاضی کھیڑیاں ہتھ دوائیاں میں

میرا وس نہ چلدا اک رتی رانجھے یار تجھے جدا ہو آئی آں میں

وارث شاہ تقدریر ایہہ رب دی اے کونج کاں دے ہتھ سونپائی آں میں

(اس مضمون کے اسٹائل اور لفظوں کے چناؤ سے یہ بات پختہ ہوجاتی ہے کہ یہ باراں ماہ وارث شاہ جنڈیالہ شیر خاں والے کے ہی ہیں۔ (وارث نمبر 1969، صفحہ نمبر 484) (ذکر وارث شاہ)

شرح قصیدہ بردہ شریف : امام ابو صیری (متوفیٰ 694 ہجری) کا لکھا ہوا عربی زبان میں قصیدہ بردہ شریف بڑی بابرکت چیز ہے، کیونکہ اس قصیدے کی برکت سے فالج زدہ شاعر حضور اکرم محمد مصطفیٰ صلی اللہ علیہ وسلم کی زیارت کا شرف بھی ملا اور ایک چادرِ مبارک بھی حضور اکرم نے خواب میں عطا کی، جس کے اثر سے بیماری دور ہوگئی، اس قصیدے کے تراجم فارسی اردو اور پنجابی میں ہوئے، اس سلسلہ میں وارث شاہ کا ترجمہ بھی بڑا قابلِ ذکر ہے، مسنز ممتاز سلیم (پشاور یونیورسٹی) نے وارث شاہ نمبر 1969 صفحہ 477 میں لکھا ہے کہ ان کے پاس وارث شاہ کا قصیدہ بردہ شریف 1152 ہجری کا لکھا ہوا موجود ہے، جس میں عربی متن کے نیچے فارسی نظم میں ترجمہ (999ہجری) میں علامہ جمال الدین چنابی کا کیا ہوا ہے، فارسی زبان کا ترجمہ پنجابی شعروں میں ہے، آکر میں پنجابی شعروں کا تعارف اس طرح کروایا گیا ہے۔

یاراں سو (1152 ہجری) بونجہ ہجری ظاہر ہوئے

تاں ایہہ بیت جواہر موتی لڑی کتاب پروئے

ایہہ ترجمہ راست کیتا میں اس شرح تھیں بھائی

حضرت میاں جمال چنابی جہڑی شرح بنائی

نانوں مصنف سید وارث وچ جنڈالے وسے

جہڑا شیر خان غازی بدھا سبھو کو اوتھے وسے

راہا زور قیامت تیک و سائیں شہر جنڈالا

کائی آفت پوے نہ اس تے وسے نت سوکھا لا

قصیدہ بردہ شریف کا پنجابی نمونہ:

سبھ خلقت تھیں نبی اسا ڈا ظاہر باطن کامل

نال محبت اپنی خالق کیتا اس نوں شامل

ہور شریک نہ کوئی حضرت وچ خوبی زیبائی

حسن ملاحت جو احمد اندر خالق آکھ سنائی

حضرت بیت مقدس چلے سبھ نبیاں تھیں اگے

ہو مخدوم سدہارے حضرت پچھے مرسل لگے

آسماناں تھیں گزرے حضرت نالے مرسل سارے

صاحب نیزہ حضرت آہی ہور سبھی بیچارے

زینت ’قدر‘ قرب تھیں حضرت کسے نبی نہ چھڈی

تاہیں جائی بلندی پہنچیا ساس بزرگی وڈی

سبھ نبیاں دے بہت ٹکانے قرب حضرت دابھاری

جاں آسماناں اتے کھڑیا اوتھے بیہن سرداری

(اوپر ”ساس بزرگی وڈی“ وچ لفظ ”ساس“ ضلع گوجرانوالہ شیخو پورہ خصوصاً جنڈیالہ شیر خاں دے علاقے وچ فعل ناقص متعلقہ ماضی بعید یا قریب واشے بولا جاتاہے، مثلاً سا۔ سو' آکھیا سو، آیا سو یعنی سو بمعنی تھا یعنی اتنی زیادہ بلندی پر حجور پہنچے تھے اسی لیے انہوں نے اتنی بڑی بزرگی والا رتبہ پایاتھا)

ڈوہڑے: (پنج دریا وارث نمبر 69 صفحہ 476)

الف:

امبڑی بابل مول نہ بھاوں تے جھڑکن بھیناں بھائی

تایا ہے دل تائے (ساڑے) میراتے تائی دیہی (جسم) تائی

چاچا مینوں ”چاچا“ مارے تے سبھناں مندی چائی

وارث ویراں کر کے میں وچ آتش پائی

ب:

میرا گھڑا گھڑولی والا حوض کوثر تھیں بھریا

کر کے سون سوپت (ہارسنگار) عرشاں تے حوراں سی سردھریا

جہڑے جوں پیغمبراں کھا ہدے مینوں اوہ وٹنا انگ چڑھیا

ج:

باہوں پکڑی بہالی ساں میں سرور عالم کھارے

چارہے یار کھلوتے پھڑکے سالو دے لڑ چارے

دہیں پھٹی سر حوراں پائی سو سو شگن وچارے

وارث شاہ دت عقد بدھونیں مرا رانجھن نال پیارے

روز الست دے دست اساڈے ملیا سی جاں ماہی

اوسے روز ریاہی آہی رانجھے دے نال۔ آہی

شروع ایجاب دتا سی ملکا (فرشتیاں) حضرت کول گواہی

وارث شاہ اوہ کون جو مینوں اکھن باہجھ نکاحی

عبرت نامہ کا نمونہ:

اک روز جہاں تھیں جانا ہے وچ قبر اندھیاری پانا ہے

تیرا گوشت کیڑیاں کھانا ہے اے غافل تینوں سار نہیں

اے جاگ کڑے کیوں ستی ایں اس نیندر غفلت لٹی ایں

توں تاہیں کھری وگتی ایں ایہہ سونا ترے در کار نہیں

توں ستیاں عمر ونجائی اے یہ چرغے تند نہ پائی اے

تری ساعت نیڑے آئی اے کیہہ کرسیں داج تیار نہیں

اج ہے تیرا مکلا وانی کیوں ستی ایں کر دعوے نی

بلھے شاہ اور وارث شاہ کی ہم عصری : سندھ یونیورسٹی کے پروفیسر احمد بشیر کا دعویٰ ہے کہ وارث شاہ کو غلام مرتضیٰ قصوری کی شاگردی کا شرف حاصل نہیں لیکن ہیر کے اندرونی اور واضح شہادت کے مقابلے میں یہ دعویٰ درست معلوم نہ ہوتا ہے، مخدوم قصور کے متعلق دیگر قیاس آرائیاں ہوسکتی ہیں لیکن مشہور عوامی روایت ہے کہ مخدوم قصوری وہی بزرگ تھے جو بلھے شاہ کے بھی استاد تھے، انہوں نے بھی شہادت دی کہ جب وارث شاہ نے ہیر لکھ کر استاد کی خدمت میں پیش کی۔ تب انہوں نے کہا کہ ”بلھے شاہ نوں پڑھایا تاں اوہنے سارنگی پھڑلئی تے توں ہیر رانجھے واقصہ چھیڑ بیٹھا ایں“ (مفہوم) بہر حال تاریخ کی کسی بات کا کوئی واضح، ٹھوس مدلل ثبوت نہ مل سکے تو اس بارے میں مشہور روایت کو ترجیح دینی چاہیے، (ابدی آوازوں صفحہ 2 از بشیر حسین ناظم) پروفیسر محمد ضیا 1935 عیسوی میں لکھا کہ یہ بات بڑی مشہور ہے کہ بلھے شاہ اور وارث شاہ ہم درس تھے یہ ایک علیحدہ بات ہے کہ نہ وارث شاہ نے بلھے شاہ کا کہیں ذکر کیا ہے اور نہ بلھے شاہ نے کہیں ذکر کیا۔ وہ لکھتے ہیں بلھے شاہ کی وفات 1171 ہجری میں ہوئی جب کہ وارث شاہ نے ہیر 1180 ہجری میں لکھی، بہر حال! انہوں نے وارث شاہ اور بلھے شاہ کو ہم عصر اور ہم درس تسلیم کیا، میرا خیال ہے کہ اگر وہ ہم درس نہ بھی تھے تو ہم مدرسہ یعنی اسکول فیلو ضرور تھے، تعلیمی میدان میں اگلی پچھلی جماعتوں میں اگر بالغرض کئی سالوں کے فرق سے آگے یا پیچھے ہوں تو بھی امکان موجود ہے، اس کیفیت کو ”استاد بھائی“ ضرور کہا جاسکتا ہے۔ (ذکر وارث شاہ صفحہ نمبر 48 مصنف خالد پرویز ملک)

وارث شاہ اور بلھے شاہ کے کلام میں خاموشی : روایت ہے کہ وارث شاہ اور بلھے شاہ دونوں ہم جماعت تھے مگر خود بلھے شاہ نے اپنی کافیوں میں یا وارث شاہ نے اپنی ہیر میں اس واقعہ کی طرف کوئی اشارہ نہیں کیا۔

پنجابی ادب کی ابتدا : بابا فرید سے پنجابی ادب کی ابتدا ہوئی پھر شاہ حسین نے اس میں بھگتی فلسفے کا پرچار کیا، بلھے شاہ نے صوفیانہ رنگ کو اپنایا، مولوی غلام رسول اور میاں محمد نے خالص مذہبی شعر کہے، خواجہ فرید نے فطرت کی عکاسی کو موضوع بنایا اور وارث شاہ نے پنجابی تہیذب کو شاعری کے رنگ میں موسیقیت بخشی، سر عبدالقادر نے وارث شاہ کو پنجابی زبان کا سعدی کہا ہے، یہ امر طے شدہ ہے کہ سب سے پہلے بابا فریدالدین گنج شکرؒ نے پنجابی کو ذریعہ اظہار بتاتے ہوئے گزرے ہوئے قتوں کی نئی نسلوں تک پہنچانے کی کامیاب کوشش کی۔ (ذکرِ وارث شاہ، صفحہ نمبر 49 مصنف خالد پروزیز ملک)

وارث شاہ کی شاعری میں روحانیت کے رنگ : ایسے صوفی شعرا میں وارث شاہ کا نام سر فہرست ہے جنہوں نے بظاہر ایک عشقیہ داستان کو مجاز کے رنگ میں پیش کر کے اس میں روحانیت کا رنگ بو دیا، انہوں نے ہیر رانجھے کی عشقیہ داستان کو شعروں کا لباس پہنچایا، اس میں ہر سطح کے اذہاں کو وہ نکتہ آفرینیاں ملتی ہیں جو ان کی رنگینی کا سبب بنتی ہیں، وارث شاہ کا اپنا عشقِ حقیقی کردار کسی بھاگ بھرک سے ہوسکتا ہے لیکن وہ عشقِ مجاز کے محدود خول سے نکل کر جلد ہی روحانیت کے ایک پاکیزہ اور وسعت پذیر محبت کے وجدان کے حلقہ میں داخل ہوگئے اور انہین جسمانی لذتون کی دلدل سے نکال کر عشقِ حقیقی کے راستے پر گامزن خداوندی نے پھر ایک ایسی وجدانی کیفیت سے ہم کنار کر دیا جس میں وارث شاہ اپنی ذات کو بھول گئے اور ربِ کائنات کی حسن آفرینیوں، رعنائیوں اور معاشرے کی نکتہ آفرینیوں سے آشنا ہوکر ایک ذات کے سوا ہر چیز سے بیگانہ ہوگئے بلکہ انہوں نے اپنی مظلوم داستان کے دو کرداروں ہی کو نہیں بلکہ ہر کردار کو مجاز سے نکال کر حقیقت کے رنگ میں ڈال دیا اور اس لافانی کتاب کے آکر میں یہ کہہ کر کتاب کی اور اس داستان کی روحانی اہمیت کو اور بھی واضح کردیا۔ ” ہیر چاک تے قلبوت جانوں بالا ناتھ ایہہ پیر بناپائی“

وارث شاہ نے فقہ اور عشق کی اہمیت کو اس طرح اجاگر کیا، رانجھے نے سہتی سے کہا۔ (ترجمہ) تم جسے کرامت کہتی ہو، اس کا دوسرا نام خودی ہے، یہ خود انسان کو انسانِ کامل بنا دیتی ہے، خودی سے انسان کی آنکھیں روشن ہوجاتی ہیں، اس میں وارث شاہ نے ایسے جھوٹے پیروں کی کرامات کی نفی کی ہے بلکہ فقر کی تشریح بھی اس موقع پر اس انداز سے کی ہے، یہ الفاظِ بلاا ناتھ کی زبان سے نکلوا کر وارث شاہ نے فقر کی تصویر اس طرح پیش کی ہے، فقر کا دوسرا نام اطاعت ہے، دوسرے کی ماں بہن کو اپنی ماں بہن سمجھو، بوڑھوں، بچوں، دکھی انسانوں، عورتوں اور کمزوروں کی سچے دل سے خدمت کرو اس خدمت کو اپنی زندگی کا شعار بنالو، فقری عجز و انکساری کا نام ہے، محبت کا نام ہے، ان کاموں میں اللہ تعالیٰ اپنی رحمت کے دروازے کھول دیتاہے۔

وارث شاہ دنیا کی بے ثباتی، ناپائیداری کا اپنے کلام میں بار بار ذکر کرتے ہیں تاکہ انسان کس کی حرص و ہوس کا شکار ہورہا ہے، اس سے عبرت حاصل کر کے زندگی کے حقیقی مقصد کو سمجھے، ان کے کلام میں اپنے مقصد کو، محبوب کو عشق کی منزلوں کو پانے کے لئے ایک جہد مسلسل کی رمق بھی ہے جس کو لوگ سمجھنے سے عاری ہیں، وارث شاہ ہر چیز کو فنا کے مقام سے دیکھتے ہیں اور برائی سے روکنے کی سعی کرتے ہیں اور زندگی کی ناپائیداری کا بار بار ذکر کرتے ہوئے نیک اعمال کی تلقین کرتے ہیں۔

وارث شاہ وساہ کیہہ زندگی داساڑی

عمر ہے نقش پتا سیاتے!

وارث شاہ وساہ کیہہ زندگی دابندہ بکرا

ہتھ قصائیاں دے!

وارث شاہ کے کلام کا ایک ترجمہ پیشِ خدمت ہے، دنیا فانی ہے سردار کی ہو یا فقر کی دونوں کے لئے اس جہاں میں فنا ہے بقا نہیں جس طرح آسمان پر بادل آتے اور چلے جاتے ہیں، اسی طرح انسان آتا ہے اور چلا جاتا ہے، لہٰذا کوئی بادشاہ ہو یا فقیر سب کا ٹھکانا قبر ہے تو وہ راستہ اختیار کرو جو بندے کو خدا سے ملاتا ہے، وارث شاہ حرص و ہوس کی دنیا کو بے حقیقت سمجھتے ہیں اور وہ انسان کو زندگی کی حقیقی منزلوں سے روشناس کراتے ہوئے اس وقت یہ الفاظ کہتے ہیں جب ہیر کے والدین رانجھے کو ملازمت سے بر طرف کر دیتے ہیں، اے وقت کے مفرور اور مجازی خداؤ، بندے پر اس طرح طعنہ زن ہو، سنو! انسان کا انسان رازق نہیں سب کا رزاق خدا ہے۔ (تاریخِ شیخوپورہ۔ صفحہ نمبر 390۔ از خالد پرویز ملک)

پہلے عظیم صوفی شاعر : وارث شاہ جامع کمالات تھے، وہ پہلے عظیم صوفی شاعر ہیں جن کے کلام میں پنجابی زبان اپنی پوری تابناکی، وسعت، لچک اور رعنائی کے ساتھ جلوہ گر ہوئی ہے، وارث شاہ کے پاس یہ الفاظ و تراکیب کا ایک لازوال ذخیرہ موجود ہے، ان میں عربی ،فارسی، سنسکرت اور ترکی زبان کے الفاظ موجود ہیں، جہاں تک تصوف و عرفان کا تعلق ہے، وارث شاہ خود صوفی حال شاعر تھے اور اس کے بحر کے شناور تھے، آپ وحدت الوجود پر کامل یقین رکھتے تھے، خود فرماتے ہیں کہ وارث شاہ یقین دی گل ایہا سب حق ہی حق ٹھہرائے جی۔

برِ صغیر ڈھائی سو سال پہلے معاشرتی، مذہبی اور سیاسی حالات ایسے تھے جن میں اسلام کی عظمتوں کو مدھم کرنے کے لئے اسلام دشمن تحریکیں چلائی جارہی تھیں، عیسائیت کی تبلیغ، ہندوؤں میں بھگتی تحریک اور اسی طرح اور تحریکیں چلانے کا مقصد صرف بر صغیر میں اسلام کے بڑھتے ہوئے اثرات ونفوذ کو روکنا تھا اور احساس ذمہ داری کے ساتھ ان تحریکوں کے نبرد آزما تھے مگر جس اسلامی طبقے نے ان تحریکوں کی کمر توڑ دی وہ تھے صوفیائے کرام جنہوں نے اپنے زہد و تقویٰ، کشف و کرامات، محبت، غیر متعصبانہ رویے اور اپنے عارفانہ کلام سے مسلمانوں کے ڈولتے ہوئے ایمان کو سہارا ہی نہ دیا بلکہ لاکھوں غیر مسلموں کو حلقہ بگوش اسلام کیا۔ (تاریخ شیخوپورہ صفحہ نمبر 390 مصنف خالد پرویز ملک)

ایک صاحبِ جلال صوفی : وارث شاہ ایک صاحبِ جلال صوفی تھے، اس عشق مجازی نے ان پر عشقِ حقیقی کا راز کھولا تھا، وارث شاہ کی دردمندی اور سوز و قلب نے ہیر کے اشعار کو بے پناہ تاثیر عطا کی انہیں سن کر اہلِ دل وجد کرنے لگتے ہیں اور عشاق کے چہرے تمتمانے لگتے ہیں وارث شاہ کا نظریہ عشق تھا کہ صبح از کو ارواح نے قالوا بلا کہہ کر جو پیمانِ وفا باندھا تھا تمام عشقاں اسی میثاق کے پابند ہیں، عشق و محبت کوئی اختیاری فعل نہیں بلکہ نوشتہ تقدیر ہے، عشق ہی کائنات کی تکون اور تخلیقِ آدم کا سبب ہے، زاہد و ریاضت بھی عشق کے بغیر بے ثمر ہے، وارث شاہ کے کلام میں تصوف کے مسئلے قرآن شریف انجیل کی تمثیلات عام ملتی ہیں۔ (ذکر وارث شاہ مصنف خالد پرویز ملک)

ہیر وارث شاہ کے بعض بند (حمد)

اول حمد خدائدا ورد کیجئے عشق کیتا سو جگ دا مول میاں

پہلے آپ ہی رب نے عشق کیتا معشوق ہے نبی رسول میاں

عشق پیر فقیر دا مرتبہ ہے مرد عشق دا بھلا رنجول میاں

کھلے تنہا ندلے باغ قلوب اندر جنہاں کیتا عشق قبول میاں

اللہ تعالیٰ کی تعریف کے بعد وارث شاہ نے عشق کی بات شروع کی ہے اور عشقِ الٰہی اور محبت کو اللہ تعالیٰ نے کائنات کی تخلیق کا سبب قرار دیا ہے، وارث شاہ کے مطابق رب عاشق ہے اور معشوق حضرت محمد مصطفیٰ ہیں علما کہتے ہیں کہ عشق ایک ایسی آگ ہے جو جلا کر راکھ کر دیتی ہے، سارے نبی اور رسول اللہ عشق میں سرشار تھے، اس پیروی میں ہر پیر، فقیر، والی اللہ اور اللہ رسول کو ماننے والے نے عشقِ الٰہی کی طرف قدم بڑھایا اور اس زندگی میں ہور کوئی عشق کے راستے پر چل سکا تو اس نے اپنی منزل حاصل کر لی اور ہمت کر کے رب کے قرب والا امتحان پاس کرلیا جو لوگ دل جان سے خدا کے قرب والی منزل کی طرف بڑھے وہ اپنے درجے کے مطابق مقام پاگئے کیونکہ رب کی رضا اور اس کی محبت والا باغ ان کے دلوں میں بہار بن کر آیا۔

نعت

دوئی نعت رسول مقبول والی جنیدے حق نزول الاک کیتا

خاکی آکھ مرتبہ وڈا دتا سبھ خلق دے عیب تھیں پاک کیتا

سرور ہوئے کے اولیاں انبیاں دا اگے حق دے آپ نوں خاک کیتا

کرے امتی امتی روز قیامت خوشی چھڈ کے جیو غمناک کیتا

محمد کی نعت بیان کرتے وقت شاہ نے ابتدا اس طرح کی کہ آپ دی شان میں حدیث قدسی ہے کہ لو لاک لما خلقت الافلاک یعنی اگر میں (اللہ تعالیٰ ) (اے نبی) آپ پیدا نہ کرتا تو آسمانوں کو بھی پیدا نہیں کرتا۔ دوسرے الفاظ میں وارث شاہ کا یہ عقیدہ تھا کہ حضور کی خاطر اللہ تعالیٰ نے یہ کائنات پیدا کی جن کا مقصد محبت اور رحمت بتائی جاتی ہے، اللہ تعالیٰ رحیم ہے اور کائنات کی بنیاد حضور صلی اللہ علیہ وسلم کو رحمت اللعالمین قرار دے کر بسم اللہ شریف میں اپنی صفت رحمٰن اور رحیم کا ذکر بھی کیا، دوسرے مصرعے میں بتایا کہ حضور صلی اللہ علیہ وسلم اگرچہ خاکی تھے بشر اور انسان تھے لیکن آپ کو خاکی کہہ کر (بشر مثلکم کی طرف شارہ) اتنا بڑا مرتبہ عطا کیا کہ دنیا کی ہر مخلوق آپ کے زیر مرتبہ رکھی گئی، جنات، فرشتے اور دیگر مخلوقات حضورصلی اللہ علیہ وسلم کے درجے کو نہ پہنچ سکی لیکن اتنا رتبہ پانے کے باوجود حضور صلی اللہ علیہ وسلم سیدالمرسلین ہیں، آپ نے ”عبدہ‘‘ بن کے رب کی رضا اور اس کی بخشش کو اپنی حیات کو معراج تسلیم کیا، اپنے پرو کاروں کی خاطر اللہ تعالیٰ کی درگاہ میں اپنی امت کی بخشش کی دعا کرتے اس دنیا سے رخصت ہوئے تخلیق کا ئنات کا باعث مسلمان تو حضور صلی اللہ علیہ وسلم ہی ہیں لیکن بزرگ بابا گورو نانک بھی اس بارے یہ یقین اور عقیدہ رکھتے تھے۔

ہن ڈٹھا نور محمدی ہن ڈٹھا نبی رسول

نانک قدرت دیکھ کے خودی گئی سب بھول

لکھیا وچ کتاب دے اول ایک خدائے

دوجا نور محمدی جو خاصا یار کہائے

لکھیا وچ کتاب دے اول ایک خدائے

دوجا نور محمدی جس چانن کیتا آئے

(انورِ محمد صفحہ 1165 از محمد ضیا اللہ بحوالہ جنم ساکھی بالا صفحہ نمبر 327)

وارث شاہ کی علمی گہرائی کی ایک جھلک : نعت کے دوسرے مصرعے ”سب خلق دے عیب تھیں پاک کیتا“ کے الفاظ سے بظاہر یوں لگتا ہے کہ حضور صلی اللہ علیہ وسلم کی ذات خلقت پاک اور معصوم ہے، حالانکہ اصل بات یہ ہے کہ وارث شاہ حضور صلی اللہ علیہ وسلم کی شانِ اقدس کی طرف بڑا اعلیٰ، بامقصد اور کابلِ قدر اشارہ کر گئے ہیں، اس بارے میں دینی الٰہی کے بڑے مخالف اور توعید وشرع سنت کو بر صغیر اور دنیا جہاں میں زنگی بخشنے والے بزرگ حضرت مجدد الف ثانی اپنے مکتوبات میں اس طرح بیان کرتے ہیں۔

1۔ حقیقت محمدی صلی اللہ علیہ وسلم جو کہ ظہور اول اور حقیۃ الحقائق ہے اس معنیٰ سے دوسرے حقائق خواہ وہ حقائق انبیا ہوں یا حقائق ملائکہ وہ سب حقائق اس (نور محمدی) کے اظلال کی مانند ہیں اورہ وہ صلی اللہ علیہ وسلم حقائق کا صل ہے (کہ) نبی اکرم صلی اللہ علیہ وسلم نے فرمایا، سب سے پہلے میرا نور پیدا کیا گیا نیز فرمایا کہ اللہ کے نور سے پید اکیا ہوں اور مومن میرے نور سے پیدا ہوئے ہیں تو لازماً آپ صلی اللہ علیہ وسلم کی ذات تمام حقائق (کائنات کے حقائق) اور اللہ تعالیٰ کے درمیان واسطہ ہوگی اور آپ صلی اللہ علیہ وسلم کے وسیلہ کے بغیر کسی کا بھی مطلوب (اللہ تعالیٰ) تک پہنچنا محال ہوگا پس آپ صلی اللہ علیہ وسلم انبیاء اور مرسلین کے نبی ہیں اور آپ کا تشریف لانا تمام جہانوں کے لئے رحمت ہے۔

مکتوباتِ امام ربانی، مکتوب نمبر 122، حصہ نہم، صفحہ 127 دفتر سوم بنام مولانا حسن دہلوی)

2۔ جاننا چاہیے کہ محمد صلی اللہ علیہ وسلم کی پیدائش پیدائشی صفت میں تمام انسانی افراد کی طرح نہیں ہے بلکہ پیدائش میں تمام جہاں کے افراد میں سے کسی ایک فرد کے ساتھ بھی آپ صلی اللہ علیہ وسلم کی پیدائش مناسبت نہیں رکھتی کیونکہ آپ صلی اللہ علیہ وسلم باوجود عنصری پیدائش کے اللہ کے نور سے پیدا ہوئے ہیں جیسا کہ ارشاد فرمایا کہ میں اللہ کے نور سے پیدا کیا گیا ہوں اور دوسروں کو یہ دولت حاصل نہیں ہوئی۔۔۔

اس باریک نکتہ کا بیان ہے کہ اللہ تعالیٰ کی حقیقی آٹھ صفات اگر چہ وجوب کے دائرہ میں داخل ہیں لیکن اس حتیاج کی وجہ سے جو ان کو اللہ کی ذات سے امکان کی بو ان میں ثابت ہے اور جب اللہ تعالیٰ کی حقیقی قدیمی صفات میں امکان کی گنجائش ہوئی تو اللہ تعالیٰ کی صفات اضافیہ میں تو امکان کا ثبوت بطریقِ اولیٰ ہوگا اور ان کا قدیمی نہ ہونا اور ان کے امکان پر بڑی دلیل ہے اور کشف صریح سے معلوم ہوا ہے کہ رسول کی پیدائش اس امکان سے ہوئی جو صفات اضافیہ سے تعلق رکھتا ہے نہ وہ امکان جو تمام ممکناتِ عالم میں ثابت ہے اور جتنا بھی وقت نظر سے ممکناتِ عالم کے صحیفہ کا مطالعہ کیا جتا ہے رسولؐ کا وجود اس جگہ مشہود نہیں ہوتا (نظر نہیں آتا) اور رسول صلی اللہ علیہ وسلم کا امکان اور آپ صلی اللہ علیہ وسلم کی پیدائش کا منشا اضافیہ امکان محسوس ہوتا ہے اور جب محمد صلی اللہ علیہ وسلم کا وجود عالمِ ممکنات میں نہ ہوگا بلکہ اس عالم سے اوپر ہوگا تو لازماً صلی اللہ علیہ وسلم کا سایہ نہ ہوگا (اور یہ بات احادیث سے ثابت ہے کہ آپ کا سایہ نہ تھا) اور یہ بھی (حقیقت) ہے کہ عالمِ شہادت میں کسی شخص کا سایہ اس شخص سے زیادہ لطیف ہوتا ہے اور جب آپ صلی اللہ علیہ وسلم سے زیادہ لطیف کوئی شے عالم میں نہ ہوگی تو ان کے سایہ کی کیا صورت ہوسکتی ہے؟“۔

”سن غور سے سن! صفت علم صفات، حقیقہ سے ہے اور وجود خارجی کے دائرہ میں داخل ہے، جب اس صفت کو کوئی نسبت لاحق ہوتی ہے اور وہ اس سے تقسیم ہو جاتی ہے مثلاً علم جمالی یا علم تفصیلی تو علم کی یہ اقسام صفات اضافیہ سے ہوں گی اور ثبوت نفس الامری کے دائرہ میں داخل ہوں گی جو صفات اضافیہ کا مقام ہے اور مشہور ہوتا ہے (مشاہدہ میں آتا ہے) کہ علم جملی جو کہ صفاتِ اضافیہ سے ہوگیا ہے وہ ایک ایسا نور ہے جو عنصری پیدائش میں جو اصلاب سے ہے ارحام متکشرہ میں گرنے کے بعد اللہ تعالیٰ کی حکمتوں اور مصلحتوں کے مطابق انسانی صورت میں جوکہ بہترین شکل و صورت ہے ظاہر ہوا ہے، لقد خلقنا الانسان فی احسن تقویم۔ ( قرآن) اور اس کا نام محمد صلی اللہ علیہ وسلم اور احمد صلی اللہ علیہ وسلم ہوا، پس علم کو ذاتِ عالم سے اتحاد ہے اور (یہ ) ایسی نیستی ہے جو دوسروں کو حاصل نہیں ہے اس جگہ احمد صلی اللہ علیہ وسلم کا احد سے قرب دریافت کرنا چاہیے کہ وہ واسطہ جو ان کے درمیان ہے (احد اور احمد صلی اللہ علیہ وسلم کے درمیان!) وہ صفت علم ہے، وہ ایک ایسا امر ہے جو مطلوب (اللہ تعالیٰ کی ذات) سے اتحاد رکھتا ہے پس حجاب کو اس جگہ کیا گنجائش ہوسکتی ہے۔۔۔ علم کا ایک ذاتی حسن ہے کہ دوسری صفات کے لیے یہ حسن ثابت نہیں ہے، لہٰذا اس فقیر کے خیال کے مطابق اللہ تعالیٰ کو محبوب ترین صفت۔۔ علم کی صفت ہے اور چونکہ اس کا حسن بے چونی کی آمیزش رکھتا ہے لہٰذا احسن اس کے ادراک سے قاصر ہے (اور) اس حسن کا پورا ادراک آخرت کی پیدائش سے وابستہ ہے جو کہ روایت (اللہ کا دیدار) کا مقام ہے (وہاں) جب خدا تعالیٰ دیکھیں گے (تو) محمد صلی اللہ علیہ وسلم کے جمال کو پالیں گے، اگر چہ دو تہائی حسن حضرت یوسف کے لئے مسلم ہے۔۔۔ لیکن آخرت میں حسن صرف حسن محمدی صلی اللہ علیہ وسلم اور جمال صرف جمالِ محمدی صلی اللہ علیہ وسلم ہے کہ وہ صلی اللہ علیہ وسلم خدا تعالیٰ کے محبوب ہیں۔ دوسرے کاحسن ان سے کس طرح مشارکت کر سکتا ہے؟۔۔ اتحادیت حاصل نہیں ہے وہ حسن بھی نہیں ہے، پس پیدائش محمدی صلی اللہ علیہ وسلم حادث ہونے کے باوجود اس کا اعتماد اللہ تعالیٰ کے قدم سے ہے اور آپ صلی اللہ علیہ وسلم کا امکان اللہ تعالیٰ کی ذات تک منتہی ہوا اور آپ صلی اللہ علیہ وسلم کا حسن ذاتِ الٰہی کا حسن ہوا۔۔۔ کہ اس میں غیر حسن کی آمیزش نہیں ہے، جب اس طرح ہوا تو لاماً آنحضرت صلی اللہ علیہ وسلم جن سے محبت متعلق ہے جمیل مطلق ہوئے اور اللہ تعالیٰ کے محبوب ٹھہرے، فان اللہ تعالیٰ جمیل ویحب الجمال، پس اللہ تعالیٰ جمیل ہے اور جمال کو پسند فرماتا ہے۔ (ترمذی و مسلم بروایت ابن مسعود)

(بحوالہ مکتوب نمبر 100 بنام شیخ انوار الحق اردو ترجمہ مکتوبات امام ربانی مجدد الف ثانی دفتر سوم حصہ دوم جلد سوم مطبوعہ کراچی صفحہ نمبر 1554-1553)

کچھ اس طرح کی بات پنجابی میں قصیدہ بردہ شریف کے مترجم مولانا شاہ نیک عالم اس طرح بیان کرتے ہیں۔

ذات نبی دی باہر دسے اس ماکان حدوثوں

ذوقی حالت دے وچ یارو حاجت زیر نہ بم دی

برزخ کبریٰ دے جد قائل ہوئے سب ایمانی

طعنے مار نہ آکھو عالم! تیری گل بھرم (وہم) دی

رسول صلی اللہ علیہ وسلم اللہ کے چار یار

چارے یار رسول دے چار گوہر سبھا اک تھیں اک چڑھیند ڑے نیں

ابو بکرؓ عمرؓ عثمانظ علیؓ آپو آپنی گنیں سہند ڑے نیں

جنہاں صدیق یقین تحقیق کیتا راہ رب دے سیس وکیند ڑے نیں

ذوق چھڈ کے جنہاں زہد کیتا واہ واہ واہ رب دے بند ڑے نیں

مدحت صحابہ : حضور صلی اللہ علیہ وسلم کے چار سچے اور مخلص صحابہ جو خلفائے راشدین بھی ہیں کے بارے اسلامی تعلیمات کی روشنی میں وارث شاہ نے اپنی محبت اور عقیدت کا اظہار کیا ہے اور یہ بات پوری طرح عیاں ہے۔

مدح پیرِ پیراں :

مدح پیر دی حب نال کیجئے جیندے خادماں دے وچ پیریاں نی

باہمجھ ایس جناب دے پار نہیں لکھ ڈھونڈ دے پھرن فقیریاں نی

جہڑے پپر دے مہر منظور ہوئے گھر تنہاں دے پیریاں میریاں نی

روز حشر دے پیر دے طالباں نوں ہتھ سجڑے ملن گیاں چیریاں نی

اس میں محبوبِ سبحانی محی الدین عبدالقادر جیلانی کی تعریف کی گئی ہے، اسلامی تصوف کی دنیا میں آپ کو جو رتبہ ملا اس بارے میں صوفیانہ لڑیچر یہ شہادت دیتا ہے کہ آپ اؤلیااللہ کے سردار ہیں، آپ کو نظر انداز کر کے کوئی بندہ فقر کے دولت حاصل نہیں کر سکتا لیکن تصوف کے منکر ایسی تصوف کے قائل نہیں۔ تصوف پر ابن جوزی کے جو اعتراضات کیے ہیں، وہ خاص وزن نہیں رکھتے، (بحوالہ تبلیس ابلیس) ابن جوزی محی الدین عبدالقادر کے ہم عصر تھے، وہ شرع پر عبور رکھتے تھے، حتیٰ کہ عبدالقادر جیلانی کی شان میں کئی بار گستاخی کے مرتکب ہوئے مگر سید وارث شاہ نے اس کو معاف رما دیا۔ بہر حال شیخ عبدالحق محدث دہلوی نے پیر پیران حضرت عبدالقادر جیلانی کے بارے اچھا بھلا لکھا اور ان کی عظمت کی نشاندہی کی، بر صغیر پاک و ہند میں سنی مسلمانوں کی اکثریت حضرت شیخ سلطان سید عبدالقادر جیلانی کی روحانی عظمت کو صدیوں سے تسلیم کرتی آرہی ہے۔

پنجابی نعت گوئی اور وارث شاہ : دنیا کی شاید ہی کوئی ایسی زبان ہو جس میں نعتِ سرورِ کائنات صلی اللہ علیہ وسلم موجود نہ ہو، دنیا کی کوئی قوم ایسی نہیں جس میں کوئی کلمہ گو نہ ہو جب مسلمان ہوگا تو نعت کا وجود بھی یقینی ہے ہر زبان کاحدودِ اربعہ، مزاح، رویہ اس کے بولنے والوں پر منحصر ہوتا ہے اور اہلِ زبان اس حوالہ سے لکھے گئے ادب سے پوری طرح متمتع ہوکر اپنی اپنی زبان میں اس کی پیروری بھی کرتے ہیں اس میں اضافہ بھی کرتے ہیں چنانچہ پاک و ہند کی زبانوں کا بھنڈار اس حوالے سے بھر پور ہے لیکن پنجابی زبان کے مزاج کے حوالے سے دیکھنے سے معلوم ہوتا ہے، یہاں اس میدان میں جس قدر بھی لکھا گیا ہے، وہ ایک الگ اور منفرد اندازِ بیان کا اظہار ہے جو صدیوں پر محیط ہے اور ایسا محسوس ہوتا ہے کہ اس زبان کے خمیر اور تخلیق میں جو عناصر کارفرما ہیں، ان کی گھٹی میں حضورِ اکرم صلی اللہ علیہ وسلم سے عقیدت بدرجہ اتم موجود ہے، یہ عجیب بات ہے کہ جب پاک و ہند کی بیشتر زبانیں حروف ابجد سے ابھی آشنا نہ تھیں وادی ہڑپہ میں اس وقت بھی گرا نمایہ پنجابی لٹریچر تخلیق کیا جا رہا تھا اور حضور سرورِ کائنات صلی اللہ علیہ وسلم سے اظہارِ عقیدت کے حوالے سے پنجابی ادبیات میں وقیع ترین حصہ موجود تھا اس موضوع پر پروفیسر ڈاکٹر سید آفتاب نقوی نے ریسرچ کر کے پی ایچ ڈی کی ڈگری لی جو ہنوز طبع نہیں ہوئی، اس سلسلہ میں تہذیبی رویہ وہی اپنایا گیا تھا جو اس دھرتی کا خاصہ تھا اسی خصوصیت کی وجہ سے حسبِ ذیل انداز میں شعری روایت کو پختہ کیا گیا کہ

کتھے مہر علی کتھے تیری ثنا

گستاخ اکھیں کتھے جا لڑیاں

تیری خیر ہووے پہرے دارا

روضے دی جالی چمن لین دے

اس وارفتگی، عقیدت اور پختگی سے بھی زیادہ گمبھیر انداز میں پنجابی نعت لکھی گئی اور لکھی جارہی ہے، نعت کی تخلیق میں اولیت کلامِ مجید کو حاصل ہے، جس کے پنجابی زبان میں ان گنت ترجمے ظم میں بھی اور نثر میں بھی ہیں، عربی، فارسی، کتب میں اس موضوع پر گراں مایہ لڑیرچر تخلیق کیا گیا ہے ان کے پنجابی ترجمے اہلِ قلم نے بڑی عقیدت سے کئے ہیں ان میں معارج النبوت اور مدارج النبوت ایسی کتابیں بھی شامل ہیں غزوات، معجزات کے بارے میں کتابیں بھی لکھی گئی ہیں یہاں تک کہ نور ناموں سے لے کر وفات ناموں تک کے موضوعات پر بیشتر عربی فارسی کتابوں کو پنجابی زبان میں منتقل کر دیا گیا اور اس طرح پنجابی ادبیات میں نعت کے حوالہ سے غیر معمولی اور وقیع اضافہ کیا گیا طبع زاد نعت گوئی اس سے بھی زیادہ تعداد میں ملتی ہے۔

حضورِ اکرم صلی اللہ علیہ وسلم کی حیاتِ مبارکہ ہی میں یہ سلسلہ شروع ہوگیا تھا، انہی نعتیہ قصائد اور عربی تخلیقی ادبیات میں بانت سعاد اس لیے قصائد بھی موجود ہیں جو کعب بن زہیر کی تخلیق ہے، یہ بات قابلِ ذکر ہے کہ کعب کے والد زہیر ان سات عربی شعرا میں سرفہرست تھے جن کے قصائد خانہ کعبہ کی دیوار پر لٹکائے گئے تھے خود بہت بڑے شاعر تھے اور فتحِ مکہ کے بعد اسلام قبول کرنے کے لئے تیار نہ ہوئے اپنے بھائی بجیر کے اسلام قبول کرنے پر ایسے پانچ شعر لکھ کر اپنے بھائی کے ساتھ حضورِ اکرم صلی اللہ علیہ وسلم کے بارے میں نازیبا الفاظ کہے جس پر کوئی قبیلہ بھی اسے پناہ دینے کے لئے تیار نہ ہوا، جزیرہ عرب اس کے لئے تنگ ہوگیا جس پر ایک نعتیہ قصیدہ میں اظہارِ ندامت کرتے ہوئے ایک معذرت نامہ لکھا جو عربی ادبیات میں شاہکارِ ادبی رچنا کے طور پر موجود ہے اور دنیا کی ہر زبان کی طرح پنجابی زبان میں بھی اس کے کئی تراجم موجود ہیں۔ جو پنجابی زبان کی لطافت اور مترجم شعرا کی وسعتِ علمی نے ان ترجموں کی عظمت میں اور بھی اضافہ کیا ہے ان میں حافظ برخوردار، جان محمد، حافظ خان محمد سیالکوٹی خاص طور پر شامل ہیں۔