قوالی اور موسیقی

فنونِ لطیفہ کو انسان کی روحانی آسودگی کا ناقابل فراموش ذریعہ تسلیم کیا گیا ہے، اسی آسودگی کے باعث انسان رنگ و نسل، ذات پات اور فرقوں سے بے نیاز ہو کہ بلکہ سیاسی و جغرافیائی حدیں توڑ کر فن کے گردیوں دیوانہ وار جمع ہو جاتے ہیں جیسے شمع کے اطراف پروانے۔

فن پرستوں کی نہ کوئی الگ ذات ہوتی ہے، نہ کوئی مخصوص ُملک اور نہ کوئی الگ قوم، فن تو وہ مرکزِ جذب و کشش ہے جس کی جانب سارا عالمِ انسانیت کھنچا چلا آتا ہے، موسیقی کو تو فنونِ لطیفہ ہیں، سب سے زیادہ متاثر کن تسلیم کیا گیا یہ تو وہ سحر ہے جو نہ صرف انسانوں کو بلکہ ساری مخلوق و ساری کائنات کو مسحور و مسرور کر دیتا ہے، اس چیز کے سحر و سرور میں وحدتِ قوم کے عناصر کیا گنوائے جائیں جس کے معمولات میں وحدتِ کا ئنات شامل ہو، قوالی کے اجزا مرکب میں مضامین کے بعد موسیقی دوسرا جزو مرکب ہے، اس کی خصوصیات جب تمام انسانوں کی کشش کا باعث ہوسکتی ہیں تو یہ کشش قومی یکجہتی کے لیے کس قدر مفید ہوسکتی ہے اس کا اندازہ خود اہلِ بصیرت کر سکتے ہیں۔