قوالی کے ابتدائی ساز، راگ تال اور ٹھیکے

قوالی کے ابتدائی سازوں کی تفصیل کسی ایک مضمون یا کتاب سے دستیاب نہیں ہوتی، البتہ مختلف مضامین میں مختلف سازوں کے حوالے ملتے ہیں جنہیں یکجا کر کے لکھیں تو دف، یک تارا، ڈھول، طبلہ، بانسری ستار اور تالی کے نام گنوائے جا سکتے ہیں۔

حضرت امیر خسرو نے قوالی کی طرز ایجاد تو کی لیکن اس کے کچھ اصول اور قاعدے تحریری شکل میں ہمیں نہیں بتلائے لہٰذا یہ علم سینہ بہ سینہ منتقل ہوتا ہوا ہم تک پہنچا، اس سفر میں اس کی کتنی صورتیں بدلیں، اس کی ابتدائی صورت کیا تھی، اس کے ابتدائی راگ اور ٹھیکے کیا تھے، اس کا قطعی علم کسی کو نہیں، ہم تک یہ طرز بڑی وسعتوں کے ساتھ پہنچی، جس کی بنا پر کہا جاسکتا ہے کہ قوالی کی طرز کسی خاص راگ یا کسی مخصوص تال کی پابند نہیں، ویسے موجودہ صدی میں دادرا، کہروا، پشتو اور دیپ چندی، نیسی تالیں اور یمن کلیان، درباری بھیرویں، پیلو، کھاوج اور جئے جئے ونتی جیسے راگ قوالی میں کثرت سے استعمال کیے گیے۔