قوالی کے مشہور فنکار

قوالی کے تمام مشہور فنکاروں کے بارے میں کچھ لکھنا تو کجا، ان تمام کے صرف نام گنوانا بھی ایک امرِ محال ہے، کیوں کہ ان فنکاروں کی نہ تو کوئی سلسلہ دار تاریخ موجود ہے اور نہ کہیں ان کی تفصیلات میسر ہیں، اس تہی دستی کا ایک اہم سبب یہ سمجھ میں آتا ہے کہ ان فنکاروں کو کل ہند شہرت غالباً کم میسر ہوئی اور مقامی شہرت کا پھیلاو اتنا نہیں ہوتا کہ ہم صدیوں بعد ان فنکاروں تک رسائی حاصل کریں۔

بعض کتابوں میں قوالی کے بعض باکمال فنکاروں کے نام درج ہیں لیکن وہ موجد قوالی حضرت امیر خسروؔ کے عہد سے قبل کے فنکار ہیں یعنی قوال نہیں بلکہ ’’سماع خواں‘‘ ہیں جو فارسی کتابوں میں ’’گویندہ‘‘ کے نام سے شریک ہیں اور تاریخ و ترجمہ کی غلطی سے اردو کتابوں میں’’قوال‘‘ کی حیثیت سے جوڑ لیے گیے ہیں، قوال تو صرف امیر خسروؔ کی ایجاد کردہ قوالی کے بعد ہی وجود پائے، اس اعتبار سے صمد قوال اور نیاز قوال کو تاریخی اہمیت حاصل ہے۔