ذکر خیر حضرت سید محمد تاج الدین ناگپوری
برصغیر کی روحانی تاریخ میں حضرت سید محمد تاج الدین ناگپوری (1861ء - 1925ء) ایک غیر معمولی اور بلند مرتبہ بزرگ گزرے ہیں، جنہوں نے مہاراشٹر کی سرزمین، بالخصوص ناگپور کو روحانی نور سے منور کیا، آپ نے رشد و ہدایت، اخوت و محبت اور انسان دوستی کا ایک ایسا عظیم مرکز قائم کیا جو آج بھی مرجعِ خلائق ہے۔
آپ کی تعلیمات نے رنگ و نسل، مذہب و ملت اور زبان و بیان کی تمام سرحدوں کو مٹا دیا، آپ نے انسان کو اس کی اصل پہچان محبت، ہمدردی اور خدمتِ خلق سے روشناس کرایا، آپ کا دل ہر انسان کے لیے دھڑکتا تھا اور آپ کی ذات ایک ایسے چراغ کی مانند تھی جو ہر طرف نور بانٹتی رہی، آج بھی لوگ آپ کو صوفی اور گرو مانتے ہیں۔
آپ کا بچپن آزمائشوں سے گھرا رہا، کم عمری ہی میں یتیمی کا داغ سہنا پڑا مگر اس کمی کو آپ نے علم و عرفان کی روشنی سے پورا کیا، چھ برس کی عمر سے لے کر اٹھارہ برس تک آپ حصولِ علم میں مشغول رہے، اسی دوران ایک صاحبِ حال درویش حضرت عبداللہ شاہ سے ملاقات ہوئی، جنہوں نے آپ کی روحانی عظمت کو پہچان لیا اور بشارت دی کہ آپ کو ولایتِ کاملہ نصیب ہوگی۔
آپ نہایت رحم دل، بردبار اور غریب نواز تھے، آپ کے لیے خدمتِ خلق محض ایک وصف نہیں بلکہ ایک فرض تھا، آپ ہر سائل کی حاجت روائی کو اپنا فریضہ سمجھتے اور محتاجوں کے دکھ درد کو اپنا دکھ درد جانتے، ابتدائی زندگی میں آپ نے ناگپور کی رجمنٹ نمبر (۸) مدراسی پلٹن میں ملازمت اختیار کی لیکن یہ دنیاوی ذمہ داری بھی آپ کے روحانی سفر میں حائل نہ ہو سکی۔
آپ کو حضرت عبداللہ قادری نوشاہی سے خاص روحانی تعلق تھا، جن کا سلسلۂ طریقت شیخ عبدالقادر جیلانی سے جا ملتا ہے، ساتھ ہی آپ کو خواجہ داؤد مکی کے اویسی فیضان سے بھی حصہ حاصل ہوا جو سلسلہ شیخ علاؤالدین علی احمد صابر کلیری سے مربوط ہے، یوں آپ کی روحانی نسبتوں میں کئی عظیم سلسلوں کی خوشبو شامل تھی۔
آپ کی کرامات، ارشادات اور روحانی تجلیات آج بھی لوگوں کے دلوں کو منور کر رہی ہیں، آپ کی زندگی کا ہر لمحہ محبتِ الٰہی، خدمتِ خلق اور توکلِ کامل کا عملی نمونہ تھا، عوام و خواص آج بھی آپ کے فیضان سے سیراب ہو رہے ہیں۔
آج بھی ناگپور میں آپ کا آستانہ تشنہ دلوں کے لیے ایک ایسا مرکزِ عقیدت ہے جہاں سے ہر زائر امید کی کرنیں سمیٹتا ہے اور روحانی سکون پا کر لوٹتا ہے، یہ درگاہ صرف ایک مزار نہیں بلکہ ایک زندہ روحانی مرکز ہے جہاں محبت، امن اور انسانیت کی خوشبو ہر وقت مہکتی رہتی ہے۔
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
