تذکرہ حضرت فریدالدین اودھی

حضرت شیخ الاسلام فریدالدین اودھی نحو، لغت، ادب تفسیر وغیرہ علوم میں امتیازی شان کے مالک تھے، مولانا عبدالحی حسنی ان کے متعلق لکھتے ہیں کہ ’’لم یکن مثلہ فی زمانہ‘‘ احکام میں امام شافعی کے پیرو تھے، اجودھیا میں شیخ الاسلامی کے باوقار منصب پر فائز تھے اور کارِ منصبی کے ساتھ طلبہ کو درس بھی دیتے تھے، علامہ شمس الدین بن یحییٰ اور شیخ علاؤالدین نیلی جیسے اکابرین آپ کے خوان علم کے ریزہ چین تھے، افسوس کہ اس یگانۂ روزگار کے تفصیلی حالات و سن وفات دستیاب نہیں، البتہ مولانا شمس الدین اودھی اور مولانا نیلی کا ان سے تلمذ یقینی طور پر بتاتا ہے کہ یہ آٹھویں صدی ہجری کے اوائل کے بزرگ تھے۔