خواجہ حاجی شریف زندنی

آپ خواجہ مودود چشتی کے مرید اور خلیفہ تھے، فقر و فاقہ آپ کو بہت پسند تھا، جس روز آپ کو فاقہ ہوتا، آپ سو رکعت نمازِ شکرانہ ادا کرتے اور فرماتے کہ فقر و فاقہ انبیا کا ورثہ ہے، آپ نے چالیس سال خلوت اور گوشہ نشینی میں بسر فرمائی اور صرف درخت کے پتوں اور جنگلی پھل پھلاری پر گذراہ کیا، جب کوئی آپ کی خدمت میں حاضر ہوتا تو خادم اسے پہلے ہی سمجھا دیتے کہ خبردار حضرت کے سامنے دنیا کا ذکر نہ کرنا ورنہ زیارت سے محروم ہو جاؤ گے۔

ایک روز کوئی کچھ نقدی آپ کی خدمت میں لایا آپ نے فرمایا کہ جنگل کی طرف دیکھ اس نے جو دیکھا تو تمام جنگل اشرفیوں سے بھرا معلوم ہوا پھر آپ نے فرمایا کہ جس کا تصرف خزانۂ غیب میں ہو وہ تمہارے مال پر کیوں نظر کرے گا آپ کی وفات 10 ماہِ رجب کو ہوئی، آپ کے خلیفہ خواجہ عثمان ہارونی تھے۔