حضرت شاہ محمد تقی نیازی المعروف عزیز میاں رازؔ بریلوی اور فن موسیقی

حضرت شاہ محمد تقی نیازی المعروف عزیز میاں رازؔ بریلوی اس فن میں بھی اتنے ماہر تھے کہ اس عہد کے بڑے بڑے فنکار معتقد تھے، مشہور طبلہ ساز احمد جان خاں تھراکو، پدم بھوشن مشتاق حسین خاں، استاد نثار حسین خاں، اچھن مہاراج، ان کا لڑکا برجو مہاراج، شمبھو مہاراج، لچھو مہاراج، بڑے غلام علی خاں، استاد محمد حسین خاں، استاد الیاس خاں، استاد خادم حسین خاں بمبٸی والے، استاد اشتیاق حسین، استاد اسحاق حسین خاں، یہ سب لوگ غلامی میں داخل تھے، عرس کی محفلوں میں آپ کے سامنے ان لوگوں کے فن کا مظاہرہ ہوتا تھا، زیادہ زمانہ نہیں گزرا سیکڑوں آدمی اس کے شاہد ہیں اور خود استاد اس فن میں جو اس وقت موجود ہیں وہ گواہی دیں گے کہ ان کے فن کے مظاہرے کے دوران ان کے فن میں کہیں جھول پیدا ہو آپ نے نظر اٹھا کر انہیں دیکھا اور انہوں نے جھک کر کان پر ہاتھ رکھا اب خواہ یہ لوگ آپ کا امتحان لینے کی غرض سے جھول پیدا کرتے ہوں خواہ ان کی خامی ہو بہر حال! حاضرینِ محفل اس بات کو سمجھ جاتے تھے کہ کچھ کمی رہ گئی تھی جو آپ کے ٹوکتے ہی پوری ہوگئی، آپ ان کے فن کی خوب داد دیتے تھے مگر جب کسی کی کمی کو محسوس کرتے خاموش ہو جاتے اور ایسی نظر سے فنکار کو دیکھتے کہ وہ اپنی کمی کا احساس کر لیتا تھا۔