رنگینیوں کا جلوۂ_عریاں بسنت ہے

رنگینیوں کا جلوۂ عریاں بسنت ہے

نظارۂ بہار بدامان بسنت ہے

روشن ہے شاخ شاخ شجر پر چراغ گل

صحن‌ چمن میں جشن چراغاں بسنت ہے

افسردہ دل بھی جلوۂ گل سے ہے باغ باغ

دل بستگی کا دہر کی ساماں بسنت ہے

کیف آفریں ہے جنبش موج نسیم صبح

میخانۂ بہار گلستاں بسنت ہے

غرقاب جس کی رو میں ہوئی کشتی خزاں

امواج رنگ و بو کا وہ طوفاں بسنت ہے

نقشہ جما رہی ہے چمن میں بہار کا

فصل خزاں سے دست و گریباں بسنت ہے

سرسوں کے کھیت کیوں نہ بنیں کشت زعفراں

جوش نمو کا حسن نمایاں بسنت ہے

کندن سا رنگ اور بسنتی یہ ساڑیاں

وجہ فروغ حسن حسیناں بسنت ہے

برقؔ اور فصل گل میں بھڑکتے ہیں داغ دل

میرے لئے تو باعث حرماں بسنت ہے