حقیقت_نما نور_پیکر کی چادر

حقیقت نما نور پیکر کی چادر

ہے مہر علی مہر انور کی چادر

یہ چادر ہے محبوب داور کی چادر

ہے نور نگاہ پیمبر کی چادر

بجھا لو چلو تشنگی آج پیاسو

ہے قسام تسنیم و کوثر کی چادر

بنایا ہے خود دست قدرت نے اس کو

ہے غوث جلی عبد قادر کی چادر

حقیقت طریقت سبھی جس میں گم ہیں

ہے اس معرفت کے سمندر کی چادر

زمانے سے شانیں نرالی ہیں اس کی

یہ چادر ہے آل پیمبر کی چادر

اسی سے ہیں وابستہ سب کی امیدیں

چھپائے گی ہم سب کو حیدر کی چادر

نصیرؔ ان سے رکھتا ہے امید اتنی

سنیں گے وہ اپنے سخنور کی چادر