تو اوڑھے جو اس کی محبت کی چادر

تو اوڑھے جو اس کی محبت کی چادر

ملے تجھ کو پھر حق سے حرمت کی چادر

رہا سر برہنہ سدا اس سے عاشق

نہ اوڑھی کبھی اس نے عزت کی چادر

تجھے دیدِ حق جب میسر ہو واعظ

تو کر چاک خود تو یہ نخوت کی چادر

رہِ عشق اے سالکو دم میں طے ہو

لپیٹو کمر سے جو ذلت کی چادر

شریعت کی پگیا حقیقت کا جامہ

وہ باندھے کمر سے ہے وحدت کی چادر

رکھے ہیں وہ تاجِ تعین کو سرپر

کئے آڑ ہیں لے کے صورت کی چادر

نبی کے ہے رخ پر نقابِ نبوت

ہے دوشِ علی پر ولایت کی چادر

اٹھے درمیاں سے کرو جہد وہ تم

چھپائے ہے حق کو یہ صورت کی چادر

اس ہونے کو دے کر نہ ہونے کو لو تم

نہ ہونا ہی ہے حق کی قربت کی چادر

حقیقت کی منزل میں چلنا کھٹن ہے

کمر پر اسدؔ باندھو ہمت کی چادر