شاعر مشرق علامہ اقبال کی شاعری ان کے فکر و فن کا احاطہ کرتی ہے۔ اس دانائے راز نے اپنے جاندار اور حیات بخش فلسفے سے اپنی افسردہ اور شکست خوردہ ملت کو ایک نئی زندگی کا پیغام دیاہے۔اس کے ادوار کا احیا کیا،اس قوم کو ایک نصب العین سے آشنا کیا۔وہ دنیا کے ان عظیم شعرا میں سے ایک ہیں جن کا کلام فلسفہ و شاعری کا حسین امتزاج ہے۔اپنے اس سحرآفرین اظہار کے لیے اقبال نے فارسی اور اردو دونوں زبانوں کا خوب استعمال کیا۔فارسی شاعری کو اس لحاظ سے زیادہ اہمیت حاصل ہے کہ انھوں نے اپنے نظام فکر کو اس شریں زبان میں مربوط، مبسوط اور جامع انداز میں پیش کیا ہے۔ان کے کلام کا بیشتر حصہ فارسی میں ہے۔ زیر نظر فارسی کلیات ہے جس میں "اسرار رموز،پیام مشرق،زبور عجم،جاوید نامہ ،پس چہ باید کرد،ارمغان حجاز " شامل ہے۔آخر میں اشاریہ بھی دیا گیا ہے۔کتاب کے ناشر شاعر مشرق علامہ اقبال کےصاحبزادے جاوید اقبال ہیں۔جنھوں نے حتی الامکان کوشش کی ہے کہ کتاب ہذا طباعت کی غلطیوں سے پاک ہو اور صحت کلام متاثر نہ ہو۔