آ کے میرے گھر سے جب وہ محفل آرا پھر گیا

آ کے میرے گھر سے جب وہ محفل آرا پھر گیا

اس کے پھرنے سے میرے سینے پہ آرا پھر گیا

جب نظر اس کی پڑی ہم آسماں سے گر پڑے

اس کے پھرتے ہی جہاں یہ ہم سے سارا پھر گیا

جانتا ہوں میں کہ مجھ سے ہو گیا ہے کچھ گناہ

دل ربا یا بے دلوں سے دل تمہارا پھر گیا

ہم تو عاشق ہیں تیرے سورج پہ جوں سورج مکھی

ہو جدھر تو بس ادھر ہی منہ ہمارا پھر گیا

کوچۂ مہ رو کی اس کو کوئی راہ ملتی نہیں

گردش گردوں سے جس کا ہو ستارا پھر گیا

گھر میں کیا اور بر کیا دل دار بن لذت نہیں

اس کے دل کو چین کیا جس کا دل آرا پھر گیا

عارفاؔ میں خواب غفلت میں رہا جب بے خبر

جاگ کر میں نے سنا دلبر پیارا پھر گیا