آنکھوں میں ہے بہار تماشا کہیں جسے

آنکھوں میں ہے بہار تماشا کہیں جسے

دل میں ہے اشتیاق کی دنیا کہیں جسے

پیدا کیا ہے مشق تصور سے قلب میں

عکس جمال یار کا جلوہ کہیں جسے

اے دوست کیوں ہے میری مصیبت پہ خندہ زن

یہ عیش وہ ہے عشرت رعنا کہیں جسے

اس کا جمال پیش نظر مدتوں سے ہے

تسکین جان و دل کا سہارا کہیں جسے

ہم تو تیری گلی کو سمجھتے ہیں اپنا عرش

کیا جانے کیا ہے عرشؔ معلی کہیں جسے

اخترؔ وہ ساری بزم میں بدنام ہو گئے

میری وہ کیا نگاہ تھی رسوا کہیں جسے