نگاہ لطف یاد آئی فسون ناز یاد آیا

نگاہ لطف یاد آئی فسون ناز یاد آیا

مجھے بربادئ دل کا حسیں انداز یاد آیا

چمن میں بلبل رنگیں نوا کی بات کیا نکلی

دل آتش بہ جاں کو شعلۂ آواز یاد آیا

صبا کے ناز رعنائی پہ زعم خوش خرامی پر

کسی سرو خراماں کا خرام ناز یاد آیا

بہ ایں شوریدگیٔ دل بہ ایں بے گانہ سامانی

نگاہ اولیں کا دل نشیں انداز یاد آیا

چمن کی یاد جب آئی تو آنکھوں سے لہو ٹپکا

قیامت سر سے گزری جب پر پرواز یاد آیا

مزا ایسا ملا دل کو نشاط نا مرادی کا

کہ دور عیش میں بھی طالع نا ساز یاد آیا

مری محرومیاں وجہ تعلق بن گئیں عارفؔ

خط تقدیر سے دست کرشمہ ساز یاد آیا