تیرے تو ڈھنگ ہیں یہی، اپنا بنا کے چھوڑ دے

تیرے تو ڈھنگ ہیں یہی، اپنا بنا کے چھوڑ دے

وہ بھی بڑا ہے باؤلا تجھ کو جو پا کے چھوڑ دے

آپ لگی میں جو پھنکے، کھیل یہ اس کے جی کے ساتھ

جلتا ہوا کنول کوئی جیسے اٹھا کے چھوڑ دے

بیڑا ہو پار کیا بھلا، باندھا ہے اس سے آسرا

کھول کے ناؤ لے چلے دھارے پہ لا کے چھوڑ دے

تیرے لیے تو کچھ نہیں میرے لیے بہت ہے یہ

ہاتھ سے ہاتھ تھام لے، اپنا بنا کے چھوڑ دے

اس نے لبھا کے آرزوؔ بدلی ہے مجھ سے آنکھ یوں

جیسے کوئی چھڑک کے تیل آگ لگا کے چھوڑ دے