بے آپ بنا کر مجھے جاتے ہیں کہاں آپ

بے آپ بنا کر مجھے جاتے ہیں کہاں آپ

ہونا ہے بھی اب کہ وہیں میں ہوں جہاں آپ

اس میں نے پھنسا رکھا ہے دھوکے میں نہیں تو

ہے اور کہاں کوئی وہاں آپ یہاں آپ

مل لیجیے پھر پوچھیے گا کیا ہے ترا نام

آئیں تو یہاں آپ بلائیں تو وہاں آپ

چھاتی سے اٹھے بھاپ کہ گرما کے چلے سانس

جب آگ لگی ہے تو پتہ دے گا دھواں آپ

ہاں ہاں وہی چاہت وہی چاہت کی کہانی

میں تو کہوں سو ڈھنگ سے سنتے ہیں کہاں آپ

اے آرزوؔ اپنے کیے ہوتا نہیں کچھ بھی

اس آس میں بیٹھا ہوں کہ بدلے گا سماں آپ