فراقِ یار میں رہتا ہوں میں نم دیدہ نم دیدہ

فراقِ یار میں رہتا ہوں میں نم دیدہ نم دیدہ

کبھی گھبرا کے رو دیتا ہوں میں پوشیدہ پوشیدہ

وہ منظر ہی عجب ہوگا جنونِ شوق کا میرے

چلوں گا جب میں نقشِ پا پہ رقصیدہ رقصیدہ

عجب جاں سوز منظر دیکھتا ہوں بزم جاناں میں

کوئی ترسیدہ ترسیدہ کوئی لرزیدہ لرزیدہ

تصدق جس کی مرضی پہ کیا ہے دین وایماں بھی

مگر پھر بھی نظر آتے ہیں وہ رنجیدہ رنجیدہ

اسی انداز سے لوٹا ہے بس صبر وسکوں میرا

میری جانب تمہارا دیکھنا دُزدیدہ دُزدیدہ

بھلا کیا تم تبسمؔ سے سنوگے داستاں میری

کسی کے ظلم پیہم سے ہے دل شوریدہ شوریدہ