اوروں کا کچھ کلام ہے میرا کلام اور

اوروں کا کچھ کلام ہے میرا کلام اور

اہل وطن کے نام ہے میرا پیام اور

لب سی لیے ہیں اہل خرد نے بہ احتیاط

کیا دیکھیے دکھائیے ابھی عقل خام اور

پیچھے رہے نہ دیس ترقی کی راہ میں

مردان کار زار ذرا تیز گام اور

کچھ تشنہ لب ادھر بھی ہیں ساقی امیدوار

یہ کیا کہ جو پیئے ہیں انہیں کو ہے جام اور

اپنی غم حیات سے نظریں ملی رہیں

وہ ہم نظر نہیں ہیں نہ ہوں ہم کلام اور

بھارت کے نام کو بھی لگیں جس سے چار چاند

کچھ تو جلیلؔ آپ کریں ایسے کام اور