بڑی مشکل سے ہم اس بے وفا کا نام لیتے ہیں

بڑی مشکل سے ہم اس بے وفا کا نام لیتے ہیں

کہ پہلے دونوں ہاتھوں سے کلیجا تھام لیتے ہیں

پڑا رہنے دو کوچے میں کوئی دن ہم غریبوں کو

تھکے ماندے مسافر ہیں ذرا آرام لیتے ہیں

مجال اتنی نہیں ہم ان کے آگے آہ کر بیٹھیں

جو درد اٹھتا ہے تو ہاتھوں سے دل کو تھام لیتے ہیں

محبت کرکے پچھتایا ہوں کیسا کیا کروں اب میں

کسی کی ہو خطا لیکن وہ میرا نام لیتے ہیں

بتا ہم کو شرفؔ کچھ تو سبب ہے ہم نہ مانیں گے

ہنسی آجاتی ہے ان کو جو تیرا نام لیتے ہیں