تمہیں دکھ بھری کہانی میں سناؤں کیا زبانی

تمہیں دکھ بھری کہانی میں سناؤں کیا زبانی

مرے اشک کر رہے ہیں میرے غم کی ترجمانی

کسے سر اٹھانے دے گی تری تیغ نوجوانی

ہے ستم کی اک روانی ہے چڑھا غضب کا پانی

وہ جو مہرباں تھا اپنا وہی آج بد گماں ہے

یہ نشیب زندگانی وہ فراز زندگانی

مرا دل وفا طلب ہے ترا دل وفا سے خالی

انہیں دو دلوں نے لکھ دی غم عشق کی کہانی

مجھے جان سے زیادہ ہے عزیز داغ دل کا

کہ یہی تو ہے کسی کی مرے پاس اک نشانی

کسی بے وفا سے اے دل ہو امید کیا وفا کی

تری کاوشیں عبث ہیں نہیں کچھ بھی ہونی جانی

کوئی کہہ دے یہ نظرؔ سے اسے فکر وصل کیوں ہے

کہ فراق زندگانی میں ہے عیش جاودانی