مرگ ظاہر میں نہاں شان مسیحائی ہے

مرگ ظاہر میں نہاں شان مسیحائی ہے

جان کھوئی تو حیاتِ ابدی پائی ہے

نہ خزاں آئی چمن میں نہ بہار آئی ہے

سب خیالات کی یہ حاشیہ آرائی ہے

میں کہاں اور تری دید کا سامان کہاں

کس نے تقدیر کی گتھی کبھی سلجھائی ہے

موت کے بعد بھی افسوس کہ انہیں آنکھیں نہ کھلیں

پھر وہی ہم ہیں وہی مرحلہ پیمائی ہے

قبر میں ساتھ کسی کا نہیں دیتا کوئی

زندگی تک ہی کی یاری وشناسائی ہے

ہوں نہ پاکیزہ خیالات غزل میں تو فناؔ

شاعری ننگ ہے یا باعث رسوائی ہے