تیغ ابرو کا تمہارے کس قدر تیز آب تھا

تیغ ابرو کا تمہارے کس قدر تیز آب تھا

سامنے اس کے جو آیا پھر وہی سیراب تھا

آفریں اس دست و بازو پر کہ پہلے وار میں

ہر رگ جاں سے مرے فوارۂ خوں ناب تھا

صید گہ میں جو نکالا تیر تم نے سرخ تھا

کشتگاں کا خوں لگا تھا یا پر سرخاب تھا

عشق میں بے کار دیکھا تاج و تخت و فرش گل

قیس کو ہر خار فرش قاقم و سنجاب تھا

اشک حسرت سے مرے آخر گرا نخل مراد

ہاں مگر ایک نخل نو میدی سو وہ شاداب تھا

سیل دریائے محبت عجز ہم کو لے گیا

عشق کا طوفان تھا ہر موج میں گرداب تھا