اپنے سے دور پاتا ہوں اہل نظر کو میں

اپنے سے دور پاتا ہوں اہل نظر کو میں

سب رکھتے ہیں جلوے کو اور جلوہ گر کو میں

کرتا ہوں یاد لذت زخم جگر کو میں

بھولا نہیں ہوں آپ کی پہلی نظر کو میں

کیسی بہار کیسا نشیمن کہاں کے گل

روتے ہیں بال و پر مجھے اور بال و پر کو میں

جلووں میں گم نظر ہے تو جلوے نظر میں گم

اب کیا کروں گا حاصل ذوق نظر کو میں

ہستی کو اپنی ہستی جاناں میں کر کے گم

کرتا ہوں چاک‌ پردۂ حد نظر کو میں

یا نامہ بر سے پوچھتا افقرؔ تھا حال یار

یا پوچھتا ہوں خیریت نامہ بر کو میں