اب کیا بتاؤں درد کہاں تھا کہاں نہ تھا

اب کیا بتاؤں درد کہاں تھا کہاں نہ تھا

پوچھی وہ بات یار نے جس کا گماں نہ تھا

اس سے زیادہ حاصل عمر رواں نہ تھا

تیرا نشاں جو پایا تو اپنا نشاں نہ تھا

دنیا ہو یا ہجوم قیامت ہو یا کہ حشر

ترے خراب عشق کا چرچا کہاں نہ تھا

آتا نظر تھا دور سے نزدیک کارواں

نزدیک ہم ہوئے تو کہیں کارواں نہ تھا

آیا نظر نہ پھر بھی جہاں میں کسی کو تو

ہر چند ترے جلوے سے خالی جہاں نہ تھا

بے پردہ اس طرح کبھی حاصل تھا لطف دید

ہستی کا بھی حجاب مرے درمیاں نہ تھا

ہر ذرۂ جہاں پہ تھا آباد اک جہاں

ہستی کا کوئی ذرہ بھی تو رائیگاں نہ تھا

افقرؔ مآل ہستیٔ فانی تھا بس یہی

کل تک تھا نام آج لحد کا نشاں نہ تھا