بندہ بنا رہا ہے حسن کلام تیرا

بندہ بنا رہا ہے حسن کلام تیرا

دنیا مطیع تیری عالم غلام تیرا

ہستی کی منزلوں میں دنیا کی کوششوں سے

اتنا پتہ چلا ہے دل ہے مقام تیرا

اے غارت گر زمانہ دنیا کا سن فسانہ

کس کس طرح ہے آیا کہنے میں نام تیرا

وہ کوئی اور ہیں جو مصروف مے کشی ہیں

ہم دیکھتے ہیں ساقی حسن نظام تیرا

دنیائے رنگ و بو کے پامال کرنے والے

محشر بھی منتظر ہے محو خرام تیرا

میں کیا بتاؤں تجھ کو کہتا ہے کیا زمانہ

اے باغباں ہے اب تو صیاد نام تیرا

جذبات کا بیاں ہے شرح غم نہاں ہے

مقبول ہو نہ کیوں پھر افقرؔ کلام تیرا