مجھ پہ وہ گزری فروغ حسن جاناں دیکھ کر

مجھ پہ وہ گزری فروغ حسن جاناں دیکھ کر

گزری تھی موسیٰ پہ جو کچھ نور یزداں دیکھ کر

لے کے آتا ہے قفس میرا ادھر صیاد کیوں

دل تڑپ جاتا ہے دیوار گلستاں دیکھ کر

بعد مردن بھی ہوئی مجھ کو نہ کچھ راحت نصیب

روح پر صدمہ ہے قاتل کو پشیماں دیکھ کر

مجھ کو اپنا خانۂ برباد آ جاتا ہے یاد

آشیاں بلبل بیکس کو ویراں دیکھ کر

ایک دن صیاد مجھ کو بھی دکھا دے دور سے

کچھ تو ہو تسکین دیوار گلستاں دیکھ کر

خفتگان خاک کی نیندیں اچٹتی ہیں حضورؐ

چین سے چلئے ذرا گور غریباں دیکھ کر

یہ ستم ہے بعد مردن بھی کہ وہ ظالم ہے خوش

مدفن عشرت کو پامال رقیباں دیکھ کر