اے عکس جمال لم یزلی اے شمع تجلیٰ کیا کہنا

اے عکس جمال لم یزلی اے شمع تجلیٰ کیا کہنا

اے نور حجابات فطرت اے حسن سراپا کیا کہنا

یہ سحر یہ فتنہ یہ جادو یہ ناز و کرشمہ کیا کہنا

آنکھوں میں رہو ہر دم میری پھر آنکھ سے پردہ کیا کہنا

آ جائے سراپا آنکھوں میں خود سامنے جلوہ رقص کرے

اس عشق کی منزل کیا کہنا اس عشق کا سجدہ کیا کہنا

شاباش جبین شوق تجھے صد آفریں اے جذب کامل

تڑپا دیا اس کے جلووں کو بے تاب نظارہ کیا کہنا

بیمار کیا لذت بخشی جو خود ہو دوا وہ درد دیا

اے چارہ گر بزم ہستی اے رشک مسیحا کیا کہنا

خود فرط عقیدت سے لب پر منظورؔ یہ کلمہ آتا ہے

تھامے جو تمہارے دامن کو اس بخت رسا کا کیا کہنا