کیا تجھ کو پتہ اے جاں کیا انجمنِ دل ہے

کیا تجھ کو پتہ اے جاں کیا انجمنِ دل ہے

ہر داغ شبِ ہجراں، رشکِ مہ کامل ہے

آساں ہے تو آساں ہے، مشکل ہے تو مشکل ہے

گل ہے تو کہیں کانٹا، یہ زیست کی منزل ہے

بر گشتہ نہ ہو اے دل کیا دوریٔ منزل ہے

وہ بھی تو ہے اک رہرو جو رہبرِ کامل ہے

رہ رہ کے تو اے بجلی کیوں کوند رہی ہے یاں

اک میرا نشیمن ہی کیا رشک کے قابل ہے

پھر تیغ بکف قاتل، وہ آیا سرِ مقتل

پھر رنگ شفق ابھرا پھر رقص میں بسمل ہے

افسردگی و حسرت، شبنم کی سحر ہونے

کلیوں کے تبسم پر بس دید کے قابل ہے

مجروح نہ ہو جائے دل آپ کا اے اخترؔ

جلووں میں نہ گم ہونا، یہ زیست کی محفل ہے