بے نیازی سے کسی کی شوق پیہم دل میں ہے

بے نیازی سے کسی کی شوق پیہم دل میں ہے

کس کشاکش میں پڑا ہوں جان کس مشکل میں ہے

کیوں جلاتے ہو مجھے تم اب تو جلنے کے لئے

شمع بھی محفل میں ہے پروانہ بھی محفل میں ہے

ایک دن وہ تھا تمنا سے ہوا دم ناک میں

ایک یہ دن ہے تمنا کی تمنا دل میں ہے

کچھ ہے پیچیدہ بھی راہ شوق رہرو کے لئے

کچھ مقدر کی کجی بھی جادۂ منزل میں ہے

واقفیت ہے تو کہہ دو صاف میرے دل کی بات

ورنہ میں تم کو بتا دوں کیا تمہارے دل میں ہے

کیا پہنچتا دو قدم کی منزل مقصود پر

رہ رووں کو لطف حاصل دورئ منزل میں ہے

ملتے ہیں اخترؔ سے خود ہی ماہ وش زہرہ جبیں

یہ کرامت کیا نئی اس مرشد کامل میں ہے