تم مسیحا ہو مرے درد کا درماں کر دو

تم مسیحا ہو مرے درد کا درماں کر دو

بار خاطر نہ اگر ہو تو یہ احساں کر دو

ہجر کی رات کی اک ایک گھڑی بھاری ہے

ہو سکے تم سے تو مشکل مری آساں کر دو

دیکھنے والوں کو ہے تاب نظر کا دعویٰ

اپنے جلووں کو ذرا اور نمایاں کر دو

غنچہ و گل کا بھی رنگ ہے محتاج فروغ

دوستو خون جگر نذر گلستاں کر دو

بڑھتا جاتا ہے شب غم کی سیاہی کا اثر

میرے ماحول کے زنداں کو درخشاں کر دو

مجھ سے تو ہو نہ سکا چارۂ تلخی حیات

ہو جو تم سے تو علاج غم دوراں کر دو