مے کدہ پر دیکھ کر کالی گھٹا چھائی ہوئی

مے کدہ پر دیکھ کر کالی گھٹا چھائی ہوئی

میری توبہ بادہ نوشی کی تمنائی ہوئی

جلوۂ حسن حقیقت کی تماشائی ہوئی

خود طبیعت میری ہی مجھ پر ہے اب آئی ہوئی

میرے ساقی ساغر دل کو طلب اس مے کی ہے

اشک کی صورت جو آنکھوں سے ہو ٹپکائی ہوئی

کیا مجھے باغ محبت میں ہو امید ثمر

ایک ہے شاخ تمنا وہ بھی مرجھائی ہوئی

کر دیا نا آشنائے ہر دو عالم عشق میں

اے جنوں جب سے تری مجھ سے شناسائی ہوئی

حکم دے بیٹھے وہ ضبط نالہ و فریاد کا

روح قالب میں مرے پھرتی ہے گھبرائی ہوئی

حسن وصورت کا اثر کہتے ہیں اے بریاںؔ اسے

اک خدائی ایک کافر کی تماشائی ہوئی