کبھی پوچھوں گا میں عمر رواں سے

کبھی پوچھوں گا میں عمر رواں سے

کہاں جائے گی آئی ہے کہاں سے

مری فریاد ہے تجھ سے الٰہی

کہ عاجز آ گیا جور بتاں سے

کوئی بیمار‌ الفت چل بسا ہے

وہ آتے ہی رہے اپنے مکاں سے

قفس مجھ کو مقدر نے دکھایا

بہت مایوس تھا میں بوستاں سے

محبت کا اثر ہم نے یہ دیکھا

نظر آتے ہیں وہ اب مہرباں سے

قفس میں ہو گئی تسکین دل کو

ہوائے گل جب آئی بوستاں سے

ترے جور و ستم بھی اے ستمگر

تجاوز کر گئے اب آسماں سے

کہو بریاںؔ نہ تم غم کی کہانی

وہ گھبراتے ہیں ایسی داستاں سے