جسے نہ ہوش ہو اپنا نہ غم کو غم جانے

جسے نہ ہوش ہو اپنا نہ غم کو غم جانے

اسے سناتے ہیں نا حق خوشی کے افسانے

متاع ہوش بھی جب لٹ چکی محبت میں

مرے رفیق اب آئے ہیں مجھ کو سمجھانے

ہمیں نے روشنی کی تھی اندھیری راہوں میں

یہ اور بات ہے دنیا ہمیں نہ پہچانے

غلط ہے شمع پہ الزام نا سپاسی کا

خود اپنی آگ میں جلتے ہیں آپ پروانے

بھری بہار میں جو کچھ گزر گئی مجھ پر

اداس غنچے سنائیں گے اب وہ افسانے

بنام امن ہے چہروں پر مصلحت کی نقاب

کہ دشمنوں کو بھی اپنے نہ کوئی پہچانے

کبھی کبھی تو وہ عالم امینؔ گزرا ہے

کہ میرے جاننے والے مجھے نہ پہچانے