میری سرکار آیا ہوں یہاں بے خانماں ہو کر

میری سرکار آیا ہوں یہاں بے خانماں ہو کر

کہاں جاؤں تمہارے در کی خاکِ آستاں ہو کر

میری اجڑی ہوئی دنیا ابھی آباد ہو جائے

میرے دل میں رہو آ کر جو میری جانِ جاں ہو کر

وہیں آنکھیں ہیں جو دیکھیں تمہیں کو جس طرف دیکھیں

وہی سر ہے رہے جو خاکِ سنگِ آستاں ہو کر

تجھے ان مست آنکھوں کی قسم اب بخش دے مستی

سما جا دل کے شیشے میں شراب ارغواں ہو کر

ہم ایسے عشق کے قرباں کہ جس نے یہ جنوں بخشا!

میرے جیب و گریباں کہہ رہے ہیں دھجیاں ہو کر

طوافِ نقشِ پائے یار کرتے ہیں سر منزل

میرے سب حسرت و ارماں غبارِ کارواں ہو کر

امیرؔ صابری کو ناز کیوں نہ ہو مقدر پر

کسی کی یاد ہے دل میں حیاتِ جاوداں ہو کر