یوں تو کیا کیا نظر نہیں آتا

یوں تو کیا کیا نظر نہیں آتا

کوئی تم سا نظر نہیں آتا

ڈھونڈتی ہیں جسے مری آنکھیں

وہ تماشا نظر نہیں آتا

ہو چلی ختم انتظار میں عمر

کوئی آتا نظر نہیں آتا

جھولیاں سب کی بھرتی جاتی ہیں

دینے والا نظر نہیں آتا

جو نظر آتے ہیں نہیں اپنے

جو ہے اپنا نظر نہیں آتا

دیکھ لیتا ہوں صورت آئینہ میں

داغ دل کا نظر نہیں آتا

اپنی آنکھوں سے اس کو دیکھوں گا

مجھے ایسا نظر نہیں آتا

زیر سایہ ہوں اس کے میں امجدؔ

جس کا سایہ نظر نہیں آتا